سربراہ پاک بحریہ کا کریکس ایریا میں اگلے مورچوں کا دورہ

آئی ایس پی آر کے مطابق پاک میرینز میں جدید ترین 2400 ٹی ڈی ہوور کرافٹس کے 3 یونٹس باضابطہ طور پر شامل کیے گئے ہیں۔ یہ جدید پلیٹ فارم پاک بحریہ کی آپریشنل صلاحیتوں میں اضافے کا باعث ہیں اور خشکی و سمندر دونوں پر بیک وقت کارروائی کرنے کی منفرد صلاحیت رکھتے ہیں۔

سربراہ پاک بحریہ نے افسران اور جوانوں سے خطاب میں کہا کہ نئے پلیٹ فارمز کی شمولیت پاک بحریہ کو جدید تقاضوں سے ہم آہنگ کرنے کے وژن کی تجدید ہے اور یہ ملک کے سمندری و ساحلی دفاع کے عزم کی بھی تجدید ہے۔

نیول چیف نے مزید کہا کہ سمندری راستوں اور میری ٹائم سیکیورٹی کا تحفظ صرف عسکری ضرورت نہیں بلکہ ملکی خودمختاری، اقتصادی خوشحالی اور استحکام کا بنیادی ستون ہے۔ انہوں نے کہا کہ پاک بحریہ اپنی خودمختاری اور سمندری سرحدوں کے ہر انچ کا دفاع کرنے کے لیے تیار ہے۔