پاک مصر تعلقات مضبوط،دوطرفہ تعاون سے عوام مستفید:فیلڈ مارشل

راولپنڈی: پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر سرکاری دورے پر مصر پہنچے ہیں۔

آئی ایس پی آر کے مطابق مصری وزارت دفاع پہنچنے پر فیلڈ مارشل کا گرمجوشی سے استقبال کیا گیا اور انہیں گارڈ آف آنر پیش کیا گیا۔ فیلڈ مارشل نے گمنام سپاہیوں کی یادگار اور مرحوم صدر محمد انوار السادات کے مزار پر پھول چڑھائے۔

دورے کا مقصد دونوں برادر ممالک کے درمیان عسکری اور دفاعی تعاون کو فروغ دینا ہے۔ فیلڈ مارشل نے مصر کے وزیر دفاع اور دفاعی پیداوار جنرل عبدالمغد سقر سے ملاقات کی اور مصر کی مسلح افواج کے چیف آف اسٹاف لیفٹیننٹ جنرل احمد خلیفہ فتح سے بھی ملاقات کی۔

ملاقاتوں میں باہمی دلچسپی کے امور، علاقائی سلامتی کی صورتحال اور دوطرفہ دفاعی تعاون پر تبادلہ خیال کیا گیا۔

فیلڈ مارشل سید عاصم منیر نے کہا کہ مصر پاکستان کا برادر ملک ہے اور دونوں ممالک کے درمیان تعاون سے عوام مستفید ہوں گے۔ انہوں نے مزید کہا کہ دوطرفہ تعاون علاقائی امن اور استحکام میں بھی مددگار ثابت ہوگا۔