اسلام آباد،پنجاب کے مختلف شہروں میں زلزلے کے جھٹکے

اسلام آباد: وفاقی دارالحکومت اسلام آباد، پنجاب اور خیبرپختونخوا کے متعدد شہروں میں زلزلے کے جھٹکے محسوس کیے گئے، جس کے باعث شہری خوفزدہ ہو کر گھروں اور عمارتوں سے باہر نکل آئے۔

ذرائع کے مطابق پشاور، ملاکنڈ، بونیر، ہری پور، دیر بالا، ٹیکسلا، داؤد خیل، گجرات، سوات، باجوڑ، بنوں اور شانگلہ سمیت مختلف علاقوں میں زمین لرز اٹھی۔

محکمہ موسمیات کے زلزلہ پیما مرکز کے مطابق ریکٹر اسکیل پر زلزلے کی شدت 5.3 ریکارڈ کی گئی، جبکہ گہرائی 234 کلو میٹر تھی۔

ابتدائی اطلاعات کے مطابق زلزلے کا مرکز افغانستان اور تاجکستان کے سرحدی پہاڑی سلسلے میں تھا۔
تاحال کسی جانی یا مالی نقصان کی اطلاع نہیں ملی۔

زلزلے کے جھٹکوں کے دوران شہریوں نے کلمہ طیبہ کا ورد کیا اور ایک دوسرے کی خیریت دریافت کی۔