اوباڑو کے قریب ڈاکوؤں کی فائرنگ،3 افراد جاں بحق
گھوٹکی (20 اکتوبر 2025) — سندھ کے ضلع گھوٹکی کی تحصیل اوباڑو کے قریب دب شاخ کے علاقے میں ڈاکوؤں کی فائرنگ سے 3 افراد جاں بحق اور 2 زخمی ہو گئے۔
پولیس حکام کے مطابق، فائرنگ کا نشانہ بننے والے افراد موٹر سائیکل پر شہر میں دودھ فروخت کرنے کے بعد اپنے گھر واپس جا رہے تھے کہ اچانک ڈاکوؤں نے ان پر فائرنگ کر دی۔
واقعے کے بعد علاقے میں خوف و ہراس پھیل گیا جبکہ پولیس کی بھاری نفری جائے وقوعہ پر پہنچ کر شواہد اکٹھے کر رہی ہے۔
پولیس نے جاں بحق اور زخمی افراد کو تحصیل اسپتال اوباڑو منتقل کر دیا ہے۔
ابتدائی اطلاعات کے مطابق واقعے کی وجہ ڈکیتی کی مزاحمت بتائی جا رہی ہے، تاہم پولیس نے مزید تحقیقات شروع کر دی ہیں۔
