پاکستان اور افغانستان فوری جنگ بندی پر متفق

بیان کے مطابق جنگ بندی پر اتفاق قطر اور ترکیہ کی ثالثی میں ہوا۔ مذاکرات میں دونوں ممالک نے آئندہ دنوں میں مزید ملاقاتیں کرنے اور خطے میں پائیدار امن و استحکام کے لیے مستقل مکینزم تشکیل دینے پر بھی اتفاق کیا۔

قطری وزارتِ خارجہ نے کہا کہ پاکستان اور افغانستان کے درمیان جنگ بندی خطے میں دیرپا امن کے قیام کی مضبوط بنیاد فراہم کرے گی اور سرحدی کشیدگی کے خاتمے میں مددگار ثابت ہوگی۔

ذرائع کے مطابق مذاکرات کا پہلا دور دوحہ میں قطری انٹیلی جنس چیف عبداللہ بن محمد الخلیفہ کی میزبانی میں منعقد ہوا۔
پاکستانی وفد کی قیادت وزیرِ دفاع خواجہ آصف نے کی، جبکہ سیکیورٹی حکام نے بھی مذاکرات میں معاونت فراہم کی۔

افغان وفد کی قیادت وزیرِ دفاع ملا محمد یعقوب نے کی، جن کے ہمراہ انٹیلی جنس چیف عبدالحق وثیق بھی موجود تھے۔

یہ پیش رفت پاکستان اور افغانستان کے درمیان بڑھتی ہوئی کشیدگی میں کمی اور سرحدی امن کے قیام کی جانب ایک اہم قدم قرار دی جا رہی ہے۔