دوحہ مذاکرات:خوارج کے حملے برداشت نہیں کیے جائیں گے،پاکستان

سرحدی کشیدگی کے تناظر میں ہونے والے ان مذاکرات میں پاکستان کی جانب سے وزیرِ دفاع خواجہ محمد آصف اور قومی سلامتی کے مشیر لیفٹیننٹ جنرل (ر) عاصم ملک نے شرکت کی۔ افغان وفد کی قیادت وزیرِ دفاع ملا محمد یعقوب اور انٹیلی جنس چیف ملا واثق نے کی۔

ذرائع کے مطابق پاکستان نے افغانستان سے سرحد پار حملے فوری طور پر روکنے کا مطالبہ کرتے ہوئے واضح کیا کہ اگر کالعدم ٹی ٹی پی کے حملے بند رہے تو پاکستان بھی کسی ردِعمل سے اجتناب کرے گا۔

مذاکرات ایک نکاتی ایجنڈے پر مرکوز رہے، جس کا مقصد پاکستان پر خوارج کے حملوں کا خاتمہ تھا۔ قطر نے اس عمل میں بھرپور سہولت کاری فراہم کی۔

ترجمان دفترِ خارجہ کے مطابق بات چیت کا محور سرحد پار دہشت گردی کے خاتمے اور خطے میں امن و استحکام کے فروغ پر رہا۔ پاکستانی وفد نے واضح کیا کہ خوارج کے حملے کسی صورت برداشت نہیں کیے جائیں گے اور کسی بھی جارحیت کی صورت میں بھرپور جواب دیا جائے گا۔

ذرائع کے مطابق دونوں فریقین نے مذاکرات کے دوران 48 گھنٹے کی عارضی جنگ بندی برقرار رکھنے پر بھی اتفاق کیا۔

دفترِ خارجہ نے کابل انتظامیہ پر زور دیا کہ وہ اپنی سرزمین پر موجود دہشتگرد گروہوں کے خلاف قابلِ تصدیق کارروائیاں کرے۔ ترجمان نے قطر کی ثالثی کی کوششوں کو سراہتے ہوئے کہا کہ یہ مذاکرات خطے میں پائیدار امن و استحکام کی سمت ایک مثبت پیش رفت ہیں۔