افغان طالبان اورفتنہ الخوارج کے حملے ناکام،20 دہشتگرد ہلاک

راولپنڈی: پاک فوج نے بلوچستان کے علاقے اسپن بولدک میں افغان طالبان اور فتنہ الخوارج کے حملوں کو ناکام بناتے ہوئے 20 طالبان کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق افغان طالبان اور فتنہ الخوارج نے اسپن بولدک کے 4 مختلف مقامات پر حملے کیے، تاہم جوابی کارروائی میں طالبان پسپا ہوئے اور 15 سے 20 دہشتگرد ہلاک بھی ہوئے۔

آئی ایس پی آر نے بتایا کہ افغان طالبان اور فتنہ الخوارج دیہات اور معصوم شہریوں کو بطور ڈھال استعمال کر رہے تھے اور انہوں نے پاک افغان دوستی گیٹ کو بھی اڑا دیا، جو ان کے تجارتی اور قبائلی رویوں کی ناپختہ سوچ ظاہر کرتا ہے۔

ذرائع کے مطابق علاقے میں صورتحال اب بھی کشیدہ ہے اور طالبان و فتنہ الخوارج مزید حملوں کی منصوبہ بندی کر رہے ہیں۔ پاک فوج نے کرم سیکٹر میں بھی ان کے حملے ناکام بنائے، جس میں 8 پوسٹیں، 6 ٹینک اور متعدد دہشتگرد تباہ و ہلاک ہوئے۔

آئی ایس پی آر نے واضح کیا کہ پاکستان کی مسلح افواج ملکی خودمختاری کے دفاع کے لیے مکمل طور پر تیار ہیں اور کسی بھی جارحیت کا بھرپور اور مؤثر جواب دیا جائے گا۔