جنگ بندی کے بعد اسرائیلی کارروائی،9 فلسطینی شہید

غزہ کی وزارتِ صحت کے مطابق گزشتہ 24 گھنٹوں میں 44 لاشیں اسپتال پہنچیں اور 29 زخمیوں کو طبی امداد دی گئی۔ 38 لاشیں ملبے کے نیچے سے نکالی گئیں، اور کئی افراد ابھی بھی ملبے میں دبے ہیں۔ امدادی ٹیمیں متاثرہ علاقوں تک رسائی میں مشکلات کا سامنا کر رہی ہیں۔

وزارت کے مطابق 7 اکتوبر 2023 سے اب تک غزہ میں ہلاکتوں کی مجموعی تعداد 67,913 اور زخمیوں کی تعداد 170,134 ہو گئی ہے۔ عینی شاہدین کے مطابق اسرائیلی فضائی اور زمینی کارروائیاں رات گئے تک جاری رہیں، جس سے شہری خوفزدہ ہوئے۔ خان یونس میں ڈرون حملے کی بھی اطلاع ملی۔

دوسری جانب اسرائیل نے اعلان کیا ہے کہ غزہ اور مصر کے درمیان رفح سرحدی گزرگاہ فی الحال بند رہے گی، جس سے جنگ بندی کے باوجود امدادی سامان نہیں پہنچ پا رہا۔ اسرائیلی حکام کا کہنا ہے کہ یہ فیصلہ اس لیے کیا گیا کیونکہ حماس نے اسرائیلی قیدیوں کی لاشیں نہیں دی ہیں۔

حماس نے بتایا کہ لاشوں کی بازیابی میں وقت لگ سکتا ہے کیونکہ بعض مقامات ملبے کے نیچے ہیں۔ اقوامِ متحدہ کے ادارے UNRWA نے بھی کہا ہے کہ اسرائیل غزہ کے لیے امدادی سامان روک رہا ہے۔