فلوٹیلا کے مزید 171 ارکان ڈی پورٹ، مشتاق احمد تاحال اسرائیلی حراست میں
تل ابیب: اسرائیلی حکومت نے غزہ کے لیے امداد لے جانے والی گلوبل صمود فلوٹیلا کے مزید 171 ارکان کو ملک بدر کردیا، تاہم پاکستان کے سابق سینیٹر مشتاق احمد خان تاحال اسرائیلی حراست میں ہیں۔
بین الاقوامی پانیوں میں اسرائیلی بحریہ نے فلوٹیلا کو روکا تھا اور اس پر موجود درجنوں ممالک کے کارکنوں کو گرفتار کیا تھا۔
اسرائیلی وزارتِ خارجہ کے مطابق تازہ ڈی پورٹ کیے گئے افراد کو یونان اور سلوواکیہ منتقل کردیا گیا ہے۔ ان کارکنوں کا تعلق یونان، اٹلی، فرانس، آئرلینڈ، سویڈن، پولینڈ، جرمنی، بلغاریہ، لیتھوانیا، آسٹریا، لکسمبرگ، فن لینڈ، ڈنمارک، سلوواکیہ، سوئٹزرلینڈ، ناروے، برطانیہ، سربیا اور امریکا سے ہے۔
اس سے قبل اسرائیلی حکام 450 سے زائد گرفتار افراد میں سے 170 کو پہلے ہی ڈی پورٹ کر چکے ہیں۔
ادھر اسرائیلی حراست سے رہا ہونے والے کئی امدادی کارکنوں نے وطن واپسی پر انکشاف کیا کہ انہیں دورانِ حراست تشدد، ہراسانی اور ادویات کی قلت جیسے حالات کا سامنا کرنا پڑا۔
