احتجاج حق ہے مگر انتشار نقصان دہ، ترجمان پاک فوج

ڈی جی آئی ایس پی آر نے 15 ستمبر کو پلندری میں مختلف جامعات کے ایک ہزار سے زائد طلبہ اور اساتذہ کے سوالات کے جوابات دیے۔ اس موقع پر ان کی گفتگو کی کچھ ویڈیوز سوشل میڈیا پر وائرل ہوگئیں۔

طلبہ کے ایک سوال پر ترجمان پاک فوج نے کہا کہ اگر ریاست ٹیکس وصول نہیں کرے گی تو عوامی سہولتیں، مراعات اور سرکاری ملازمین کی تنخواہیں کیسے ادا کی جائیں گی۔

عوامی ایکشن کمیٹی کی احتجاجی حکمتِ عملی سے متعلق سوال پر ان کا کہنا تھا کہ آزاد کشمیر میں سیاسی سسٹم قائم ہے اور فعال انداز میں کام کر رہا ہے۔ انہوں نے کہا کہ تعلیم، صحت اور انفراسٹرکچر کے تمام اشاریے بہتر ہیں، اور مسائل کو پُرامن سیاسی عمل کے ذریعے حل کیا جانا چاہیے۔