جنسی زیادتی کا جھوٹا مقدمہ درج کرانے والی خاتون گرفتار

ترجمان پولیس کے مطابق، خاتون نے تھانہ کوتوالی میں دو افراد کے خلاف اسلحے کے زور پر جنسی زیادتی کا مقدمہ درج کرایا تھا، تاہم تحقیقات میں الزام غلط ثابت ہوا۔ پولیس تفتیش میں یہ بات سامنے آئی کہ مقدمہ فراڈ پر مبنی تھا اور خاتون نے اپنی اصل شناخت بھی چھپائی تھی۔ اس نے شناختی کارڈ نہ ہونے کا دعویٰ کیا، لیکن نادرا ریکارڈ میں اس کی مکمل تفصیلات موجود تھیں۔

پولیس نے خاتون کی مدعیت میں درج مقدمہ خارج کر دیا اور اس کے خلاف اینٹی ریپ ایکٹ کے تحت نیا مقدمہ درج کر لیا ہے۔

ڈی پی او بلال افتخار کیانی نے بتایا کہ ملزمہ سے مزید تفتیش جاری ہے اور اس میں شامل تمام افراد کے خلاف کارروائی عمل میں لائی جائے گی۔