اسلامی سربراہی اجلاس کا متفقہ اعلامیہ جاری

عالمی خبر رساں اداروں کے مطابق اعلامیے میں اسرائیلی جارحیت اور جنگی جرائم کی شدید مذمت کی گئی، اور تمام ممالک سے اسرائیل کو اسلحہ کی فراہمی روکنے کی اپیل کی گئی۔ عرب و مسلم رہنماؤں نے اسرائیل کے ساتھ سفارتی و معاشی تعلقات پر نظرِ ثانی کا بھی مطالبہ کیا۔

اعلامیے میں کہا گیا کہ قطر پر اسرائیلی حملہ خطے کے امن کی ہر کوشش کو نقصان پہنچاتا ہے۔ اجلاس میں شریک ممالک نے قطر کے ساتھ مکمل یکجہتی کا اظہار کرتے ہوئے اسرائیلی اقدامات کے خلاف اس کے ردعمل کی حمایت کا عزم کیا۔

بیان میں قطر کے مہذب اور ذمہ دارانہ موقف کو سراہتے ہوئے کہا گیا کہ ثالثی کے کردار پر حملہ عالمی امن عمل کے لیے خطرہ ہے۔ رہنماؤں نے واضح کیا کہ کسی بھی صورت اسرائیلی جارحیت کو جواز فراہم نہیں کیا جاسکتا اور قطر کو دوبارہ نشانہ بنانے کی دھمکیوں کو مسترد کرتے ہیں۔

اعلامیے میں غزہ میں جنگ بندی کے لیے قطر، مصر اور امریکا کی کوششوں کی مکمل حمایت اور خطے میں امن و استحکام کے لیے قطر کے کردار کو سراہا گیا۔

قبل ازیں عرب ریاستوں کی کونسل نے اجتماعی سلامتی، اتحاد اور خطے کو جوہری ہتھیاروں سے پاک کرنے کی ضرورت پر زور دیتے ہوئے قرارداد منظور کی تھی۔