افغان نکالنے سے دہشت گردی ختم نہیں ہوگی،عمران خان

توشہ خانہ 2 کیس کی سماعت کے بعد میڈیا سے گفتگو میں علیمہ خان نے کہا کہ بانی پی ٹی آئی کے خلاف جھوٹے گواہ پیش کیے جا رہے ہیں، جن کی سزا سات سال قید ہے۔ انہوں نے کہا کہ عمران خان کا ملٹری ٹرائل چل رہا ہے اور انہیں اپنے بچوں سے بات کرنے کی بھی اجازت نہیں دی جا رہی۔

علیمہ خان کے مطابق عمران خان نے کہا کہ افغانوں کو دھکے دے کر نکالا گیا ہے، جبکہ دہشت گردی کے باعث فوجی، پولیس اہلکار اور عام شہری جان سے جا رہے ہیں۔ انہوں نے تجویز دی کہ خیبرپختونخوا کے تمام ایم این ایز اور ایم پی ایز علی امین گنڈا پور کے ساتھ بیٹھیں اور محمود خان اچکزئی کے وفد کے ساتھ افغانستان جائیں۔

عمران خان نے مزید کہا کہ ان کا مینڈیٹ چھینا گیا، پارٹی کو دبایا گیا، اور ملک میں "عاصم لاء” نافذ ہے۔ انہوں نے پشاور میں فوری جلسے کی کال دیتے ہوئے کہا کہ یہ حکومت ناجائز ہے۔

بانی پی ٹی آئی کے وکیل بیرسٹر سلمان صفدر نے میڈیا سے گفتگو میں کہا کہ توشہ خانہ 2 کیس میں حکومت پوری طاقت جھونک رہی ہے اور گواہوں میں بار بار وہی افراد شامل کیے جا رہے ہیں۔ انہوں نے کہا کہ ہمارے کیسز ہائی کورٹ میں مقرر نہیں کیے جا رہے اور چیف جسٹس سے اپیل کی کہ مقدمات جلد سماعت کے لیے مقرر کیے جائیں۔