ایشیا کپ:بھارت نے پاکستان کو 7 وکٹوں سے ہرادیا

ایشیا کپ ٹی ٹوئنٹی کے گروپ اے کے چھٹے میچ میں بھارت نے پاکستان کو 7 وکٹوں سے شکست دے دی۔

دبئی میں کھیلے گئے اس ہائی وولٹیج مقابلے میں پاکستان نے ٹاس جیت کر بیٹنگ کا فیصلہ کیا لیکن قومی ٹیم کی بیٹنگ لائن مشکلات کا شکار رہی۔ پوری ٹیم مقررہ 20 اوورز میں 9 وکٹوں کے نقصان پر صرف 127 رنز بنا سکی۔

ابتدائی بلے باز صائم ایوب بغیر کوئی رن بنائے آؤٹ ہوئے، محمد حارث صرف 3 رنز بنا سکے جبکہ فخر زمان 17 رنز کی اننگز کھیل کر پویلین لوٹے۔ کپتان سلمان علی آغا بھی 3 رنز ہی بنا سکے۔ صاحبزادہ فرحان نے 44 گیندوں پر 40 رنز بنائے جبکہ شاہین شاہ آفریدی نے جارحانہ کھیل پیش کرتے ہوئے 16 گیندوں پر 33 رنز ناٹ آؤٹ بنائے، جس میں 4 چھکے شامل تھے۔

بھارت کی طرف سے کلدیپ یادیو نے 3 وکٹیں حاصل کیں جبکہ اکشر پٹیل اور جسپریت بمراہ نے 2،2 کھلاڑیوں کو آؤٹ کیا۔

جواب میں بھارتی بیٹنگ لائن نے ہدف 16ویں اوور میں 3 وکٹوں کے نقصان پر حاصل کر لیا۔ کپتان سوریا کمار یادیو 47 رنز بنا کر ناٹ آؤٹ رہے۔ ابھیشیک شرما اور تلک ورما نے 31، 31 رنز اسکور کیے جبکہ شبمن گل اور شیوم دوبے نے 10، 10 رنز بنائے۔

پاکستان کی جانب سے تینوں وکٹیں صائم ایوب کے حصے میں آئیں۔