صدر آصف علی زرداری کا چین کے ایئرکرافٹ کمپلیکس کا دورہ

بریفنگ میں جے 10، جے ایف 17 اور جے 20 اسٹیلتھ فائٹرز کے ساتھ ساتھ ڈرون ٹیکنالوجی، خودکار نظام اور کثیرالجہتی آپریشنز کے حوالے سے آگاہ کیا گیا۔ بتایا گیا کہ جے 10 سی طیارے اسی کمپلیکس میں تیار کیے جاتے ہیں جنہوں نے حالیہ آپریشنز میں نمایاں کردار ادا کیا۔

صدر آصف علی زرداری نے کہا کہ جے 10 اور جے ایف 17 طیاروں کی شمولیت سے پاک فضائیہ کی صلاحیتوں میں خاطر خواہ اضافہ ہوا ہے اور ان کی کارکردگی حالیہ معرکوں میں شاندار رہی۔

انہوں نے اس موقع پر چین کی دفاعی ٹیکنالوجی کو پاک چین شراکت داری کی عملی مثال قرار دیا اور کہا کہ پاکستان ہوا بازی اور دفاعی پیداوار کے شعبے میں چین کے ساتھ تعاون مزید بڑھانے کا خواہاں ہے۔

یہ پہلا موقع ہے کہ کوئی غیر ملکی سربراہ اس کمپلیکس کا دورہ کر رہا ہے۔ صدر کے ہمراہ بلاول بھٹو زرداری، خاتونِ اول آصفہ بھٹو زرداری، سینیٹر سلیم مانڈوی والا، پاکستانی سفیر خلیل ہاشمی اور چین کے سفیر جیانگ زائی ڈونگ بھی موجود تھے۔