عراقی فضائیہ کے کمانڈر کی ایئر ہیڈکوارٹرز اسلام آباد آمد

عراقی فضائیہ کے کمانڈر جنرل غالب محمد رادی نے ایئر ہیڈکوارٹرز اسلام آباد کا دورہ کیا، جہاں ان کی ملاقات پاک فضائیہ کے سربراہ ایئر چیف مارشل ظہیر احمد بابر سدھو سے ہوئی۔

آئی ایس پی آر کے مطابق ملاقات میں پیشہ ورانہ امور، باہمی تعاون اور فضائیہ سے متعلق دلچسپی کے دیگر پہلوؤں پر تفصیلی گفتگو کی گئی۔ دونوں جانب سے دفاعی تعاون کے فروغ، مشترکہ تربیت، استعداد کار بڑھانے اور ایوی ایشن انڈسٹری میں ترقی کے امکانات پر زور دیا گیا۔

ایئر چیف مارشل نے پاکستان اور عراق کے تاریخی و برادرانہ تعلقات کو اجاگر کرتے ہوئے کہا کہ پاک فضائیہ عراقی فضائیہ کی تربیت اور استعداد بڑھانے کے لیے ہر ممکن تعاون جاری رکھے گی۔

اعلامیے کے مطابق دونوں فضائیہ کے سربراہان نے مشترکہ مشقوں اور تربیتی اقدامات کو مزید وسعت دینے پر اتفاق کیا۔