خیبرپختونخوا،سکیورٹی فورسز کی کارروائیاں،19 دہشت گرد ہلاک

پاک فوج کے شعبہ تعلقات عامہ (آئی ایس پی آر) کے مطابق 9 اور 10 ستمبر کی رات مہمند، شمالی وزیرستان اور بنوں میں کارروائیاں کی گئیں۔ مہمند کے علاقے گولونو میں 14 دہشت گرد مارے گئے، دتہ خیل (شمالی وزیرستان) میں 4 دہشت گرد انجام کو پہنچے جبکہ بنوں میں ایک دہشت گرد ہلاک ہوا۔

آئی ایس پی آر کے مطابق دہشت گردوں کے قبضے سے اسلحہ اور بارود بھی برآمد ہوا۔ یہ گروہ علاقے میں مختلف دہشت گردانہ کارروائیوں میں ملوث تھا۔ بچے کھچے عناصر کی تلاش کے لیے آپریشنز جاری ہیں۔

فوجی ترجمان کا کہنا ہے کہ سکیورٹی فورسز ملک سے دہشت گردی کے مکمل خاتمے کے لیے پرعزم ہیں اور بھارتی پشت پناہی رکھنے والے دہشت گردوں کے خلاف کارروائیاں بلا تعطل جاری رہیں گی۔

وزیراعظم شہباز شریف نے فورسز کی کامیاب کارروائیوں پر خراج تحسین پیش کرتے ہوئے کہا کہ دہشت گردی کے خلاف جنگ آخری حد تک لڑی جائے گی۔ انہوں نے کہا کہ افواجِ پاکستان کے جوان فتنہ خوارج اور بھارتی عزائم کو ناکام بنانے میں مصروف عمل ہیں اور پوری قوم ان کے ساتھ کھڑی ہے۔

وفاقی وزیر داخلہ محسن نقوی نے بھی سکیورٹی فورسز کی کامیابیوں کو سراہتے ہوئے کہا کہ قوم ان بہادر جوانوں کو سلام پیش کرتی ہے۔ ان کے مطابق عوام کی حمایت کے ساتھ بھارتی سرپرستی میں سرگرم دہشت گردوں کا مکمل خاتمہ کیا جائے گا۔