جلالپور،دریائے چناب میں کشتی ڈوب گئی،5 افراد جاں بحق

جلالپور،دریائے چناب میں کشتی ڈوب گئی،5 افراد جاں بحق

جاں بحق افراد میں بخت بی بی ، فاطمہ بی بی ، عامر، ماہ نور اوردو نومولود بچے شامل،وزیراعلیٰ پنجاب کا اظہار افسوس
جلالپور پیروالا دریائے چناب میں آئے سیلاب سے ریسکیو کرتے ہوئے کشتی ڈوب گئی جس میں ایک خاتون اور 4 بچوں سمیت 5 افراد ڈوب کر جاں بحق ہوگئے ۔تفصیلات کے مطابق ریسکیو 1122 کی کشتی سیلاب زدگان کو ریسکیو کرتے ہوئے ڈوبی، کشتی میں 20 سے زائد افراد سوار تھے جن میں بچے اور خواتین شامل، متعدد افراد کو ریسکیو کی جانب سے نکال لیا گیا جبکہ ڈوبنے والے باقی افراد کی تلاش کیلئے ریسکیو آپریشن جاری ہے۔تحصیل جلالپور کے نواحی علاقہ وچھہ سندیلہ میں افسوسناک واقعہ پیش آیا، جاں بحق افراد میں 80 سالہ بخت بی بی ، 6 سالہ فاطمہ بی بی ، 7 سالہ عامر، 3 سالہ ماہ نور اور 6 ماہ اور 3 ماہ کے نومولود دو بچے شامل ہیں۔ وزیراعلیٰ مریم نواز نے المناک حادثے میں قیمتی انسانی جانوں کے ضیاع پراظہارافسوس کیا ہے، وزیراعلیٰ مریم نواز نے جاں بحق افراد کے لواحقین سے اظہار ہمدردی و تعزیت کیا ۔ کشتی الٹنے کے واقعہ پر ڈی جی پی ڈی ایم اے عرفان علی کاٹھیا نے ڈی سی ملتان سے ٹیلی فونک رابطہ کیا جس دوران بریفنگ میں بتایا گیا کہ پانی کے تیز بہائوکے باعث کشتی عدم توازن کا شکار ہوئی۔ ڈی جی پی ڈی ایم اے نے زخمیوں کوبہترین طبی امداد فراہم کرنے کی ہدایت کر دی ، سیلابی صورتحال میں متاثرین کے انخلا کو محفوظ بنایا جائے گا۔ انہوں نے کہا کہ پرائیویٹ بوٹس یا ریسکیو بوٹس میں ہرگزاوورلوڈنگ نہ کی جائے۔