افغانستان میں زلزلےسے بڑی تباہی،ہلاکتیں500 سے تجاوز کرگئیں

افغان میڈیا رپورٹس کے مطابق سب سے زیادہ نقصان صوبہ ننگرہار اور کنڑ میں ہوا ہے، جہاں ضلع نورگل کے متعدد دیہات مکمل طور پر مٹ گئے ہیں۔ ہلاکتیں نورگل، سواکئی، واٹاپور، منوگی اور چپہ درہ سمیت کئی اضلاع میں رپورٹ ہوئیں جبکہ حکام کو خدشہ ہے کہ سیکڑوں افراد اب بھی ملبے تلے دبے ہوئے ہیں۔

حکام کا کہنا ہے کہ ہلاکتوں اور زخمیوں کی حتمی تعداد تاحال سامنے نہیں آسکی کیونکہ متاثرہ دور دراز علاقوں سے رابطے بحال کرنے کی کوششیں جاری ہیں۔ ان اضلاع میں امدادی سرگرمیاں بھی تیزی سے جاری ہیں۔

افغان حکومت کے ترجمان ذبیح اللہ مجاہد نے جانی و مالی نقصان کی تصدیق کرتے ہوئے کہا کہ مقامی حکام اور عوام ریسکیو کارروائیوں میں حصہ لے رہے ہیں، جبکہ مرکز اور قریبی صوبوں سے امدادی ٹیمیں بھی متاثرہ علاقوں میں روانہ کر دی گئی ہیں۔

واضح رہے کہ گزشتہ رات آنے والے زلزلے کی شدت 6.2 ریکارڈ کی گئی تھی جس کا مرکز ننگرہار کے قریب جلال آباد تھا، اور اس کی گہرائی 8 کلومیٹر تھی۔

زلزلے کے جھٹکے پاکستان کے شہروں اسلام آباد، لاہور، پشاور اور دیگر علاقوں میں بھی محسوس کیے گئے تھے، تاہم وہاں کسی جانی نقصان کی اطلاع نہیں ملی۔