پنجاب میں سیلاب کی تباہ کاریاں،بند ٹوٹنے سے بستیاں زیرِ آب

کمشنر گوجرانوالہ ڈویژن نوید حیدر شیرازی کے مطابق سیلابی صورتحال میں 7 افراد جاں بحق ہوئے جن میں 3 کا تعلق گجرات، 2 سمبڑیال جبکہ ایک ایک شخص گوجرانوالہ اور نارووال سے ہے۔

بہاولپور میں دریائے ستلج کے پانی کے دباؤ سے یوسف والا اور احمد والا کے عارضی بند ٹوٹ گئے جس سے بستی احمد بخش سمیت کئی علاقے زیرِ آب آگئے۔ پانی کے تیز بہاؤ سے زمینی کٹاؤ بڑھ گیا اور کپاس و دھان سمیت درجنوں ایکڑ پر کھڑی فصلیں متاثر ہوئیں۔

دریائے چناب میں کوٹ مومن کے مقام پر 6 لاکھ کیوسک کا ریلا داخل ہوا ہے، جبکہ آج 10 لاکھ کیوسک کا ریلا گزرنے کا امکان ہے۔ ڈپٹی کمشنر سرگودھا کے مطابق ضلعی انتظامیہ ہائی الرٹ پر ہے، ریلیف کیمپس فعال ہیں اور اب تک 2500 افراد اور 1700 سے زائد مویشی محفوظ مقامات پر منتقل کیے جا چکے ہیں۔

اسی طرح وہاڑی کے لڈن کے قریب موضع نون میں حفاظتی بند ٹوٹنے سے کئی بستیاں زیر آب آ گئیں۔ دریائے راوی میں ہیڈ بلوکی کے مقام پر درمیانے درجے کا سیلاب ہے اور پانی کی سطح مسلسل بلند ہو رہی ہے۔ ریسکیو ٹیموں نے اب تک 30 افراد کو محفوظ مقامات پر منتقل کیا ہے۔

ادھر نوشہرو فیروز میں دریائے سندھ کے قریب کنڈیارو کے مقام پر زمینداری بند ٹوٹنے سے سیکڑوں ایکڑ زمین پر کھڑی فصلیں اور 5 دیہات متاثر ہوئے۔