کراچی:ڈمپر نے بہن بھائی کو کچل دیا، والد زخمی،7ڈمپرجلا دیئے

ریسکیو ذرائع کے مطابق زخمیوں کو فوری طور پر اسپتال منتقل کیا گیا، تاہم راستے میں بائیس سالہ ماہ نور اور چودہ سالہ علی رضا دم توڑ گئے۔ جاں بحق ہونے والے بہن بھائی کے والد اسپتال میں زیر علاج ہیں۔

حادثے کے بعد علاقے میں صورتحال کشیدہ ہوگئی اور مشتعل شہریوں نے سات ڈمپروں کو آگ لگا دی، جبکہ موٹر سائیکل کو ٹکر مارنے والے ڈمپر کے ڈرائیور پر بھی تشدد کیا، جسے بعد ازاں پولیس کے حوالے کردیا گیا۔

ایس ایس پی سینٹرل کے مطابق ڈمپر ڈرائیور کو گرفتار کرلیا گیا ہے اور دس سے زائد مشتعل شہریوں کو بھی حراست میں لے لیا گیا۔ واقعے کے بعد راشد منہاس روڈ کو ہر قسم کی ٹریفک کے لیے بند کردیا گیا۔

ڈمپر ڈرائیور ایسوسی ایشن نے آگ لگائے جانے کے خلاف احتجاج کرتے ہوئے سپرہائی وے سہراب گوٹھ سے سڑک ٹریفک کے لیے بند کردی، جس کی وجہ سے ٹریفک کی روانہ شدید متاثر ہے، ڈمپر ڈرائیور ایسوسی ایشن نے نیشنل ہائی وے بھی بلاک کرنے کا اعلان کردیا۔

صدر ڈمپر ایسوسی ایشن حاجی لیاقت محسود نےدعویٰ کیا کہ حادثہ ٹینکر کی ٹکر سے ہوا اور مشتعل افراد نے ڈمپر کو آگ لگا دی۔

انہوں نے کہا کہ سات ڈمپرز جلانے کی ذمہ داری سندھ حکومت پر عائد ہوتی ہے۔

گورنر سندھ کامران ٹیسوری نے اس المناک حادثے پر گہرے دکھ اور افسوس کا اظہار کیا اور زخمی شہری کی جلد صحت یابی کے لیے دعا کی۔

انہوں نے سندھ حکومت سے مطالبہ کیا کہ حادثے کے ذمہ دار ڈمپر ڈرائیور کو قرار واقعی سزا دی جائے۔ ساتھ ہی مشتعل شہریوں کو قانون ہاتھ میں لینے سے گریز کرنے کی ہدایت کرتے ہوئے کہا کہ سندھ حکومت شہریوں کی جان سے کھیلنے والے ڈمپر مافیا کو لگام ڈالے۔