بچوں کی اسمگلنگ میں ملوث این جی او ہوپ کی چیئرپرسن گرفتار

ایف آئی اے اینٹی ہیومن ٹریفکنگ سرکل (اے ایچ ٹی سی) کراچی نے ایک بڑی کارروائی کرتے ہوئے معروف این جی او HOPE کی چیئرپرسن ڈاکٹر مبینہ قاسم اگبوٹوالا کو بچوں کی غیر قانونی اسمگلنگ کے الزام میں گرفتار کرلیا ہے۔

ذرائع کے مطابق، ملزمہ ہوپ نامی این جی او کے پردے میں نابالغ بچوں کو بیرونِ ملک، خصوصاً امریکہ، اسمگل کرنے میں ملوث تھی۔ اس گھناؤنے نیٹ ورک کا انکشاف اُس وقت ہوا جب امریکی قونصل خانے نے ایف آئی اے کو باقاعدہ شکایت درج کروائی، جس کے بعد تفتیش کا آغاز کیا گیا۔

تحقیقات کے دوران واضح شواہد سامنے آنے پر کیس رجسٹر کیا گیا۔ گرفتاری سے بچنے کے لیے ملزمہ نے قبل از گرفتاری ضمانت کی درخواست دی تھی، تاہم پیر کو عدالت نے اُس کی درخواست مسترد کر دی، جس کے بعد ایف آئی اے اہلکاروں نے فوری کارروائی کرتے ہوئے اسے گرفتار کرلیا ہے۔

ذرائع کا کہنا ہے کہ یہ گرفتاری انسانی اسمگلنگ کے منظم نیٹ ورکس کے خلاف جاری ایف آئی اے کی مہم میں ایک اہم پیش رفت ہے، خاص طور پر وہ نیٹ ورکس جو "فلاحی تنظیموں” کا لبادہ اوڑھ کر مکروہ دھندہ چلا رہے ہیں۔

ایف آئی اے حکام کا کہنا ہے کہ تحقیقات کا دائرہ وسیع کر دیا گیا ہے اور دیگر ممکنہ سہولت کاروں کے خلاف بھی جلد کارروائی متوقع ہے۔