ایران، عراق کا سفر اس سال بذریعہ سڑک ممنوع قرار

محسن نقوی کا کہنا ہے کہ دفترِ خارجہ، بلوچستان حکومت اور سیکیورٹی ایجنسیوں سے طویل مشاورت کے بعد عوام کے تحفظ اور نیشنل سیکیورٹی کے پیشِ نظر یہ مشکل فیصلہ کرنا پڑا۔

وزیرِ داخلہ محسن نقوی کی وزیر اعظم شہباز شریف سے ملاقات ہوئی، جس میں انہوں نے  وزیرِ اعظم کو زائرین کی نئی پالیسی سے متعلق بریفنگ دی۔

وزیرِ اعظم نے زائرین کے لیے خصوصی پروازوں کا انتظام کرنے کی ہدایت کر دی، ملاقات میں بلوچستان میں امن و امان کی صورتِ حال پر بھی بریفنگ دی گئی۔

وزیرِاعظم نے وزیرِ داخلہ کو گوادر سیف سٹی پر کام شروع کرنے کی بھی ہدایت کی۔

خیال رہے کہ گزشتہ دنوں زائرین کی سہولت کے لیے پاکستان، ایران اور عراق نے مشترکہ ورکنگ گروپ بنانے کا فیصلہ کیا تھا۔

یہ بھی پڑھیں:۔ اسلام آباد،گدھے کا گوشت ملنے کے معاملے میں پیشرفت

تہران میں سہ ملکی وزرائے داخلہ کی کانفرنس میں ایران اور عراق جانے والے زائرین کو ہر ممکن سہولت فراہم کرنے پر اتفاق کیا گیا۔

وزیرِ داخلہ محسن نقوی کا کہنا تھا کہ آئندہ سال جنوری سے پاکستانی زائرین انفرادی طور پر عراق نہیں جا سکیں گے، زائرین گروپ آرگنائزرز کی رجسٹریشن شروع کر دی گئی ہے، گروپ آرگنائزر سسٹم سے غیر قانونی طور پر عراق اور ایران جانے والوں کو روکنے میں مدد ملے گی۔

یہ بھی پڑھیں:۔کیپٹن محمد سرور شہید کا 77واں یومِ شہادت آج منایا جارہا ہے

محسن نقوی کا کہنا تھا کہ آرگنائزرز زائرین کی وطن واپسی کے ذمے دار ہوں گے، ایران اور عراق بھی نئے نظام کے ساتھ ہیں، سب جانتے ہیں کہ اربعین پر لاکھوں زائرین عراق جاتے ہیں، عراقی حکومت جس طرح لاکھوں زائرین کی دیکھ بھال کرتی ہے وہ قابلِ تحسین ہے، زائرین سے متعلق عراق، ایران کو پاکستان کی جانب سے ہر ممکن تعاون کی یقین دہانی کرواتے ہیں، یکم جنوری 2026ء کے بعد پاکستانی زائرین انفرادی طور پر عراق نہیں جا سکیں گے، صرف وہی لوگ انفرادی طور پر عراق جا سکیں گے جنہیں سفارتخانہ خصوصی ویزا جاری کرے گا۔