مذاکرات کا حتمی فیصلہ عمران خان کریں گے، شاہ محمود قریشی

صحافیوں سے گفتگو کرتے ہوئے شاہ محمود قریشی کا کہنا تھا کہ دو سال بعد جیل میں قید پی ٹی آئی رہنماؤں کی متفقہ رائے ہے کہ مذاکرات کی راہ اپنائی جائے۔ ان کا کہنا تھا کہ اگر ہماری بات کا جواب نہ دیا گیا تو پھر ہمارے پاس احتجاج کا آپشن ہی باقی رہ جاتا ہے۔

شاہ محمود قریشی نے کہا کہ ہم ہمیشہ چاہتے تھے کہ مذاکرات مقتدر حلقوں کے ساتھ ہوں لیکن اگر ان کا مؤقف یہ ہے کہ سیاست سیاسی جماعتوں کا کام ہے، تو پھر ہمیں سیاستدانوں سے ہی بات کرنی ہو گی۔ کس حکومتی شخصیت سے بات چیت کی جائے گی؟ اس کا نام وقت آنے پر بتاؤں گا۔

سینئر پی ٹی آئی رہنما کا کہنا تھا کہ رہنمائی اور آئندہ کے لائحہ عمل کے لیے بانی پی ٹی آئی عمران خان تک ہماری رسائی ضروری ہے۔ انہوں نے مطالبہ کیا کہ بیرسٹر گوہر اور سلمان اکرم راجہ کو بھی ہم سے جیل میں ملاقات کی اجازت دی جائے تاکہ قانونی و سیاسی مشاورت ممکن ہو سکے۔