ایران اوراسرائیل میں جلد امن کراؤں گا،ڈونلڈ ٹرمپ

واشنگٹن سے جاری بیان میں امریکی صدر نے کہا ہے کہ ایران اور اسرائیل کے درمیان ہم جلد امن کرائیں گے۔

انہوں نے کہا کہ ایران اور اسرائیل میں ویسا ہی معاہدہ ہو گا، جیسا میں نے بھارت اور پاکستان کے درمیان کرایا۔

ڈونلڈ ٹرمپ نے کہا کہ پاکستان بھارت معاہدے میں امریکا کے ساتھ تجارت کی دلیل استعمال کی، میں نے دو بہترین رہنماؤں سے بات کی جو فوری فیصلہ کر سکتے تھے اور سب کچھ رُک گیا۔

ان کا کہنا ہے کہ جلد ہی ایران اور اسرائیل کے درمیان بھی امن قائم ہو گا، میں بہت کچھ کرتا ہوں، مجھے کبھی کسی چیز کا کریڈٹ نہیں ملتا۔

امریکی صدر نے کہا کہ اپنی پہلی مدت صدارت کے دوران سربیا اور کوسووو میں معاہدہ کرایا تھا، بائیڈن نے کچھ احمقانہ فیصلوں سے طویل مدتی امکانات کو نقصان پہنچایا، میں ان نقصانات کو دوبارہ ٹھیک کر دوں گا۔
انہوں نے کہا کہ مصر اور ایتھوپیا میں دریائے نیل پر ڈیم کا جھگڑا بھی میں نے نمٹایا، میری مداخلت کی وجہ سے مصر اور ایتھوپیا میں امن قائم رہے گا۔

ڈونلڈ ٹرمپ نے کہا کہ بہت ساری ملاقاتیں، فون کالز ہو رہی ہیں، مشرقِ وسطیٰ کو دوبارہ عظیم بناؤ، جلد ہی ایران اور اسرائیل کے درمیان بھی امن قائم ہو گا۔