کراچی کی ملیر جیل سے سو قیدی فرار،ایک مارا گیا

بعض غیر مصدقہ اطلاعات کے مطابق ایک مفرور قیدی آپریشن کے دوران ہلاک ہو گیا جبکہ پولیس اور ایف سی کے متعدد اہلکاروں کے بھی زخمی ہونے کی غیر مصدقہ اطلاعات موجود ہیں۔
ذرائع کا کہنا ہے کہ ملیر کے علاقے میں زلزلے کی جھٹکوں کے باعث قیدیوں کو بیرکس سے باہر منتقل کیا گیا تھا جس کا فائدہ اٹھا کر انہوں نے جیل سے فرار کا راستہ اختیار کیا تاہم پولیس اور قانون نافذ کرنے والے ادارے فوری طور پر حرکت میں آ گئے اور متعدد قیدیوں کو دوبارہ گرفتار کر لیا گیا۔

دوبارہ پکڑے گئے قیدی
مفرور قیدیوں کو بھینس کالونی قذافی ٹاؤن اور دیگر ملحقہ علاقوں سے گرفتار کیا گیا ہے۔
وزیر داخلہ سندھ ضیا لنجار آپریشن کی نگرانی کر رہے ہیں جبکہ ایس ایس پی ملیر کاشف عباسی آپریشن کرنے والی پولیس فورس کی قیادت کر رہے ہیں۔صورت حال کو کنٹرول کرنے کے لیے پولیس کی بھاری نفری ملیر جیل طلب کر لی گئی ہے جبکہ لانڈی جیل میں بھی سرچ اپریشن جاری ہے۔

اطلاعات کے مطابق ملیر جیل میں 22 سے 23 سوقیدیوں کی گنجائش موجود ہے تاہم یہاں چار سے چھ ہزار کے قریب قیدیوں کو رکھا گیا ہے۔
وزیر داخلہ سندھ ضیالنجار کے مطابق فرار ہونے والے قیدی سنگین جرائم میں ملوث نہیں ہیں بلکہ نشے سمیت چوری وغیرہ کے مقدمات میں ملوث ہیں