کراچی کا ریل رابطہ باقی ملک سے کیوں کٹا؟

کراچی میں پاکستان اسٹیل ملز کے برطرف ملازمین کے احتجاج کے نتیجے میں ملک کے سب سے بڑے شہر کا باقی شہروں سے ریل رابطہ کئی گھنٹے تک منقطع رہا۔
اسٹیل مل کے برطرف ملازمین نے ریلوے ٹریک پر دھرنا دے رکھا تھا جس کی وجہ سے ٹرینوں کا سارا نظام درہم برہم ہو کر رہ گیا۔
اس دوران ہزاروں ٹرین مسافر پھنسے رہے۔10 گھنٹے سے زائد وقت تک احتجاج جاری رہنے کے نتیجے میں عورتوں اور بچوں سمیت ٹرین مسافروں کی حالت غیر ہو گئی اور ان کے پاس کھانے پینے کی اشیاء بھی ختم ہو گئیں۔
اکانومی کلاس میں سفر کرنے والے کئی بزرگ مسافروں کہ بے ہوش ہونے کی بھی اطلاع ملی ہے۔اس صورتحال میں کراچی سے دیگر شہروں کو جانے والی ٹرینوں کو روک دیا گیا جبکہ ملک کے دیگر حصوں سے کراچی آنے والی ٹرینیں حیدرآباد اور کراچی کے درمیان روک دی گئیں۔
دوسری طرف کئی مسافروں نے مجبور ہو کر بسوں اور دیگر گاڑیوں کے ذریعے منزل کی طرف جانے کی کوشش کی۔اس دوران ٹرانسپورٹ مافیا نے بھی من مانے کرائے وصول کیے۔کراچی سے لاہور جانے والی ٹرین کراچی ایکسپریس 10 گھنٹے سے زائد وقت تک دھابے جی کے پاس رکی رہی جس کے نتیجے میں مسافر اذیت کا شکار رہے۔