راولپنڈی مری روڈ بیوٹیفیکیشن منصوبے کے تحت اہم اقدامات

سینئر صوبائی وزیر نے نالہ لئی منصوبے کی فیزیبلٹی تین ماہ میں مکمل، دسمبر میں رنگ روڈ کی تکمیل یقینی بنانے کی ہدایت کی۔ اجلاس میں پورے راولپنڈی ڈویژن میں ستھرا پنجاب پر عملدرآمد کا جائزہ لیا گیا جس پر سامنے آنے والی خامیوں کو دور کرنے کی ہدایت کی گئی۔ تین دن کی ڈیڈ لائن میں پیرودھائی سے غیرقانونی بس اڈے ختم کرنے پر وزیر اعلیٰ مریم نوازشریف کی ضلعی انتظامیہ اور پولیس کو شاباش دی۔ سینئر صوبائی وزیر مریم اورنگزیب نے وزیراعلیٰ مریم نوازشریف کی ہدایت پر فیض آباد سے بھی بسوں کے اڈے،تجاوزات کے خاتمے اور شہریوں کی سہولت کو یقینی بنانے کی ہدایت کی۔

وزیراعلیٰ مریم نوازشریف نے اگلے جمعہ تک پورے مری روڈ کی بیوٹیفکیشن،صفائی اور اپ لفٹنگ پلان کی بھی منظوری دے رکھی ہے۔ سینئر صوبائی وزیر مریم اورنگزیب نے کہا کہ پورے راولپنڈی ڈویژن میں تجاوزات کے خاتمے کا عوام نے خیر مقدم کیا ہے۔ وزیر اعلی نے پولیس حکام کو راولپنڈی ڈویژن کو منشیات سے پاک کرنے کا ٹاسک دیا ہے۔ وزیراعلیٰ مریم نوازشریف نے راولپنڈی ڈویژن کے سرحدی علاقوں میں نگرانی اور گشت بڑھانے کی ہدایت کی ہے۔ وزیراعلیٰ مریم نوازشریف کی ہدایت پرمنشیات کی سمگلنگ اور فروخت میں ملوث مافیا کے خلاف کریک ڈاؤن کی بھی منظوری دی گئی۔ بعد ازاں سینئر منسٹرمریم اورنگزیب نے حکام کے ہمراہ راولپنڈی کے مختلف ہسپتالوں کے علاوہ راجہ بازار، فوارہ چوک اور صدر کابھی دورہ کیا۔ سینئر صوبائی وزیر نے تجاوزات کے خاتمے کے اب تک کے اقدامات، ہسپتالوں میں مریضوں کے علاج معالجے کے انتظامات کا جائزہ لیا۔
٭٭