کیوں در زنداں کھلتا ہے؟

وہ میری لائبریری کی پہلی کتاب تھی۔ اگلے 73 برس میں وہ لائبریری کچھ اسی طرح بڑھی۔ کوئی کتاب کسی سے پڑھنے کے لیے لی تو کبھی دینے والے کو واپسی یاد نہ رہی، تو کبھی میں نے رونی شکل بنا کر کہہ دیا کہ گم ہو گئی ہے۔ ایک آنہ روز کا جیب خرچ مشکل سے آدھی چھٹی میں گڑ چنے کے لیے پورا ہوتا تھا۔ کتاب کی خریداری کہاں سے کرتا۔ گورڈن کالج پہنچنے تک شاید بیس با بائیس کتابیں ہوگئی تھیں۔ سوچا تو بہت کہ لائبریری سے چوری کا موقع ملے مگر انگریز بڑے سیانے تھے کہ مسجد سے جوتا چرانے والی قوم ہے، اعتبار کے قابل نہیں۔ کتاب پندرہ دن کے لیے ملتی تھی تو چودھویں کے چاند جیسی لائبریرین یاد دلا دیتی کہ کل پندرھواں دن کتاب کی واپسی کا ہے۔ پھر بھی ایک کتاب کے لیے درد ناک کہانی بنائی کہ کیسے بس میں رہ گئی ۔شفیق اور بزرگ پرنسپل آر آر سٹیورٹ نے کہا کہ قیمت اقساط میں ادا کر دو۔ ترس یوں نہیں کھایا کہ تب ماہانہ 26 روپے کی فیس دینے والا کیسے کہتا کہ میں واقعی غریب ہوں ۔ غریب تو ساڑھے تین روپے ماہانہ پر گورنمنٹ کالج میں پڑھتا۔ شاید اسے پتا نہیں تھا کہ کچھ باپ کیسے پیٹ کاٹ کے اولاد کے لیے ناممکن کو ممکن بناتے ہیں۔
وارے نیارے ہوئے جب میں بی اے کرنے پشاور کے ایڈورڈز کالج میں پہنچا۔ وہ آسٹریلین گورا پرنسپل تھا جسے خبط تھا اعتماد سکھانے کا۔۔۔ ہمت ہے تو خزانہ لوٹو، جہاں اعتبار کا معاملہ ہو تو ایک پیسہ خزانے میں کم نہ ہو۔
مجھ سے سینئر احمد فراز نے بتایا کہ لائبریری کھلی ہے، جو کتاب چاہو نکالو اور پڑھو۔ باہر لے جانے کے لیے اس خوابیدہ سے لائبریرین کو نام لکھوا دو۔۔۔۔اب دیکھیں کہ اللہ کیسے قلوب کو بدلتا ہے۔ صرف ایک کتاب قمیص کے اندر چھپا کے نکالی تو رات بڈھا فل ایڈمنڈ خواب میں آیا اور کہتا رہا مسٹر اکبال۔۔کل کتاب واپس وہیں رکھ دینا۔ یو آر اے گڈ بوائے۔۔۔۔۔ پس ایسا ہی ہوا۔

سیکھی یہیں مرے دل کافر نے بندگی
رب کریم ہے تو تری رہگزر میں ہے

پھر ریڈیو پاکستان پشاور کے در کھل گئے، افسانوں ڈراموں کا معاوضہ ملنے لگا۔ پہلی تحفے میں ملنے والی کتاب فراز کا مجموعہ کلام "تنہا تنہا”،  پہلی خریدی ہوئی کتاب "نقش فریادی” ہوئی۔ اس کے بعد جب کتاب نے مجبور کیا کہ مجھے خریدو تو دل نے کتاب کا ساتھ دیا؛ یوں سالہا سال تک خریدی ہوئی کتابوں سے لائبریری بنتی گئی۔ اس میں اکثریت فکشن کی تھی۔ نصف صدی بعد وہ وقت آیا جب میں کراچی کے گلشن معمار والے اپنے "خوابوں کے محل” میں تھا کہ ہمیں کتابیں اعزازی ملنے لگیں اور نو وارد ان پر "گر قبول افتد۔۔۔۔۔” لکھنے لگے تو اردو کے منتخب شعر و ادب کی یہ لائبریری ہزاروں کتب پر مشتمل تھی۔
تب گردش روزگار کے سبب میں لوٹ کے پنڈی آیا تو کرایہ کے گھر میں احساس ہوا کہ کتابوں سے زیادہ انسانوں کے لیے رہنے کی جگہ ضروری ہے۔ سو کتابوں کو کارٹن میں محبوس کر دیا گیا۔۔ اس کے بعد ہر تیسرے چوتھے سال کرائے کے نئے مکان میں سامان منتقل کرنا پڑتا تو مزدور کتابوں کی تعداد سے حیران اور وزن سے پریشان ہوتے۔ کوئی پوچھ لیتا کہ اتنی کتابوں کو پڑھنے سے کیا ہوتا ہے؟ اسے ترس آتا تھا کہ اتنی کتابیں پڑھ لیں مگر رہتا کرائے کے گھر میں ہے۔ پانچ یا چھ گھر بدلنے کے بعد اب میری لائبریری ایک سٹور روم میں فالتو اور بے مصرف سامان کے درمیان کہیں پڑی ہے۔۔اور وہیں پڑی رہے گی جب تک ان کو کباڑی تول کے نہیں لے جاتا۔کتابوں کے ساتھ اب ایسا ہی ہوتا ہے۔ میں مستقبل قریب میں کم سے کم تین احباب کے ایسے اسباب شوق کا یہ انجام تصور کر سکتا ہوں۔
لیکن وہ جو مشہور ہے کہ اللہ شکر خورے کو شکر دیتا ہے وہ بڑا سچ ہے۔ اچانک "پی ڈی ایف” اور الیکٹرونک لائبریری کا ظہور ہوا اور اب میں پھر اپنی خوش بختی پر نازاں ہوں کہ سینکڑوں من پسند کتابوں کی پوری لائبریری ایک لیپ ٹاپ میں ساتھ لیے پھرتا ہوں.