بانی کی ضمانت کی درخواستیں بطور اعتراض سماعت کیلئے مقرر

چیف جسٹس لاہور ہائیکورٹ کی سربراہی میں دو رکنی بینچ 13 جنوری کو درخواستوں پر اعتراض کی سماعت کرے گا۔

لاہور ہائیکورٹ آفس نے درخواستوں کے ناقابل سماعت ہونے کا اعتراض عائد کیا تھا۔

ہائیکورٹ آفس کی جانب سے اعتراض عائد کیا گیا تھا کہ بانی پی ٹی آئی کا وکالت نامے پر نشان انگوٹھا نہیں، درخواستوں میں دیگر مصدقہ دستاویزات لف نہیں کی گئیں۔

لاہور ہائی کورٹ میں بانی پی ٹی آئی نے جناح ہاؤس حملہ سمیت دیگر مقدمات میں درخواست ضمانت دائر کی، جس میں انہوں نے مؤقف اپنایا کہ 9 مئی کو میں اسلام آباد میں نیب کی تحویل میں تھا، سیاسی انتقام کےلیے سازش کا الزام لگا کر مقدمات میں نامزد کیا گیا ہے۔

درخواست میں کہا گیا کہ 2 سال سے مقدمات کا سامنا کر رہا ہوں، انتقامی کارروائی کی جا رہی ہے۔

بانی پی ٹی آئی کی جانب سے درخواست میں استدعا کی گئی ہے کہ مقدمات میں ضمانت کی درخواستیں منظور کی جائیں۔