انور مقصود کے اغوا کی افواہیں جھوٹی نکلیں

پاکستانی مصنف انور مقصود نے فوج سے متعلق بیان پر معذرت اور اغوا کی خبروں کی تردید کردی۔
معروف مزاح نگار، مصنف اور نقاد انور مقصود کے حوالےسے سوشل میڈیا پر دعویٰ کیا جارہا تھا کہ انہیں چند روز قبل نامعلوم افراد نے اغوا کیا، تشدد کا نشانہ بنایا اور انہیں دھمکیاں دیں، انور مقصود نے آج ایسی تمام تر خبروں کو مسترد کردیا ہے۔

آرٹس کونسل کراچی میں اپنی تقریر کے دوران، انور مقصود نے مسلح افواج اور نیوی کے حوالے سے کیے گئے اپنے مزاحیہ تبصرے پر معذرت کی اور اغوا کی خبروں کو غلط قرار دیا ہے۔ انہوں نے کہا کہ ان کے بیان کا مقصد کسی کی دل آزاری کرنا ہرگز نہیں تھا اور وہ ہمیشہ اپنے تبصروں میں طنز و مزاح کا سہارا لیتے ہیں۔

انور مقصود نے اس موقع پر ان خبروں کی بھی سختی سے تردید کی جن میں ان کے اغوا یا انہیں "اوپر” سے کال آنے کے دعوے کیے جا رہے تھے, انہوں نے وضاحت کی کہ وہ بخیر و عافیت ہیں اور ایسی تمام افواہیں بے بنیاد ہیں۔

انور مقصود کا کہنا تھا کہ وہ پاکستان کے تمام اداروں، بشمول نیوی اور مسلح افواج کا احترام کرتے ہیں, انہوں نے مزید کہا کہ ان کا طنز ہمیشہ اصلاح کی نیت سے ہوتا ہے نہ کہ کسی کی توہین کے لیے۔ انور مقصود نے اپنی گفتگو کے اختتام پر محبت اور اتحاد کا پیغام دیتے ہوئے کہا کہ وہ ہمیشہ ملک و قوم کے خیرخواہ ہیں۔

اس موقع پر پروگرام میں موجود حاضرین نے ان کے بیان کا خیرمقدم کیا اور ان کی دیانت داری کو سراہا۔