ملکہ کوہسار نے برف کی چادر اوڑھ لی

مری میں بارش اور برف باری کا سلسلہ جاری ہے۔  ڈی جی پی ڈی ایم اے عرفان علی کاٹھیا نے مری انتظامیہ کو الرٹ رہنے کی ہدایات جاری کر دی ہیں۔

تفصیلات کے مطابق ملکہ کوہسار میں بارش اور برف باری کا سلسہ شروع ہوگیا ہے۔ آئندہ 24 گھنٹوں کے دوران مزید بارش اور برف باری کے امکانات ہیں۔ ڈی جی نے انتظامیہ کو ہدایت کی ہے کہ کسی قسم کی غفلت کا مظاہرہ نہ کیا جائے۔ بارش اور برف باری کے باعث سڑکوں پر ٹریفک کی روانی متاثر ہوسکتی ہے، اس لیے ہیوی مشینری کے استعمال سے برف کو ساتھ ساتھ ہٹایا جائے تاکہ شاہراؤں پر ٹریفک کی روانی کو یقینی بنایا جائے۔

ڈی جی عرفان علی کاٹھیا نے کہا، ۔۔

"سیاحوں کو موسم کی مناسبت سے سہولیات فراہم کرنا انتظامیہ کی ذمہ داری ہے۔ مری میں سیاحوں کی رہنمائی کے لیے 13 فسیلیٹیشن سینٹرز قائم ہیں۔ سیاحوں سے گزارش ہے کہ موسم کی صورت حال کا جائزہ لے کر سفر پر نکلیں۔ مری ملکہ کوہسار ہے، کوشش ہے کہ کوئی ناخوشگوار واقعہ رونما نہ ہو”

انہوں نے مزید کہا کہ تمام ادارے عوام الناس کی خدمت میں مصروف ہیں۔ شہریوں کو چاہیے کہ وہ احتیاط کریں اور غیر ضروری سفر سے گریز کریں۔