پی ٹی آئی کے اسلام آباد جلسے کا اجازت نامہ منسوخ

پاکستان تحریک انصاف (پی ٹی آئی) کے کل کے اسلام آباد جلسے کا اجازت نامہ (این او سی) منسوخ کردیا گیا۔

اسلام آباد کی ضلعی انتظامیہ نے پی ٹی آئی کے جلسے کا این او سی منسوخ کیا ہے اور کہا کہ چند دن قبل بھی مظاہرین سپریم کورٹ پہنچ گئے تھے۔

ضلعی انتظامیہ کے مطابق ان حالات میں اسلام آباد میں جلسے کی اجازت نہیں دی جاسکتی ہے۔

ضلعی انتظامیہ کے اعلامیہ کے مطابق چیف کمشنر اسلام آباد کی زیر صدارت اجلاس میں این او سی منسوخی کا فیصلہ کیا گیا۔

اعلامیے کے مطابق اجلاس میں ڈپٹی کمشنر (ڈی سی) اسلام آباد کی جانب سے جاری کیے گئے این او سی کا جائزہ لیا گیا۔

اعلامیے میں کہا گیا کہ پی ٹی آئی کے جلسے کے این او سی کی منسوخی کا فیصلہ ڈسٹرکٹ انٹیلی جنس کمیٹی کی رپورٹ پر کیا گیا۔

اس میں مزید کہا گیا کہ اجلاس میں آئی جی اسلام آباد نے مختلف ایونٹس کے سبب سیکیورٹی خدشات کا اظہار کیا۔

اعلامیے کے مطابق بنگلادیش کرکٹ ٹیم اسلام آباد میں ہے، شدید سیکیورٹی تحفظات ہیں، ایسے میں جلسے کے ہجوم کو کنٹرول کرنا مشکل ہوجاتا ہے۔