آزادکشمیر کے صدربیرسٹر سلطان محمود چوہدری نے کہا ہےکہ فلسفہ شہادت حسینؓ اس بات کا درس دیتا ہے کہ مسلمان کلمہ حق کیلئے کسی چیز کی پرواہ نہ کریں اگر انہیں جان بھی قربان کرنا پڑ جائے تو اس سے دریغ نہ کریں. امام عالی مقام نے کربلا میں حق وسچائی پر ہر حال میں کاربند رہنے،ظلم کیخلاف سینہ سپر ہونے،برداشت تحمل،حریت واخلاص کا درس دیا اور عملی مظاہرہ کیا۔ آج اس مقدس موقع پر ہمیں یہ عہد کرنا ہے کہ ہم اپنی قومی زندگی میں اخوت، ہم آہنگی اور قربانی کے جذبے کو فروغ دیں گے۔
وزیر اعظم آزاد جموں وکشمیر چوہدری انوارالحق نے کہاہے کہ حضرت امام حسینؓ نے حق کی ترویج، عدل کے نفاذ، ہر قسم کے ظلم، ہر قسم کی زیادتی اور معاشرتی برائی کے خاتمہ کیلئے نہ صرف اپنی جان کا نذرانہ پیش کیا بلکہ اپنی قیمتی متاع اپنی اولاد کو قربان کر دیا۔یوم عاشور پر اپنے پیغام میں انہوں نے کہا آج مقبوضہ کشمیرکا ہر مسلمان بچہ اپنی جان کی بازی بھی ان ہی اقدارکے تحفظ کیلئے لگا رہا ہے۔وہ اپنے سے کئی گنا بڑے دشمن سے بر سرپیکار ہے۔جب تک مقبوضہ کشمیر کا چپہ چپہ بھارتی قبضہ سے آزاد نہیں ہوجاتا رسم شبیری ادا ہوتی رہے گی۔
