حکومت کا پی ٹی آئی پر پابندی کا فیصلہ جذباتی ہے، اسفندیار ولی

عوامی نیشنل پارٹی (اے این پی) کے رہبر تحریک اسفندیار ولی نے حکومت کے پاکستان تحریک انصاف (پی ٹی آئی) پر پابندی کے فیصلے کو جذباتی قرار دیا ہے۔

پشاور سے جاری بیان میں اسفند یار ولی نے کہا کہ حکومت کی جانب سے پی ٹی آئی پر پابندی کا فیصلہ جذباتی ہے، جذبات پر مبنی فیصلوں کے نتائج کسی صورت سود مند نہیں ہوتے۔

انہوں نے کہا کہ ماضی کے غلط فیصلوں کے اثرات آج تک سیاست پر نمایاں ہیں، سیاست میں ذاتی خواہشات اور جذبات پر قابو پانا اصل امتحان ہے۔

اے این پی کے رہبر تحریک نے مزید کہا کہ جمہوریت اور سیاسی عمل کی مضبوطی کے لیے غلطیوں سے سیکھنا ہوگا، حکومت کا پی ٹی آئی پر پابندی کا فیصلہ غیر منطقی اور سمجھ سے بالاتر ہے۔

اُن کا کہنا تھا کہ نیشنل عوامی پارٹی پر پابندی کی صورت میں ہم ان فیصلوں کا سامنا کرچکے ہیں۔