ترمٹھیاں بیروٹ کا 22 سالہ نوجوان پہاڑ سے پھسل کر جاں بحق

ایبٹ آباد کی یوسی بیروٹ نکر قطبال کے قریب ایک 22 سالہ نوجوان پہاڑ سے پھسل کر گہری کھائی میں جا گرااور جان بحق ہو گیا جبکہ دوسرا شدید زخمی ہو گیا۔

ریسکیو ذرائع کے مطابق متوفی کا نام عادل ولد عبد الرحیم ہے جو اپنے کزن معاذ کے ساتھ لہور کس جنت آبشار کی سیر کیلئے جا رہا تھا کہ نکر قطبال کے مقام پرپہاڑ سے پاؤں پھسلنے کے نتیجے میں سینکڑوں فٹ گہری کھائی میں جا گرا۔عدل کو بچانے کیلئے اس کا کزن  معاذ بھی پیچھے گیا تاہم وہ بھی گر کر زخمی ہو گیا۔متوفی کا تعلق بیروٹ کے گاؤں تر مٹھیاں سے ہے۔

مقامی لوگوں کے مطابق وی سی ترمٹھیاں کہو شرقی کے علاقے، بہک سے تعلق رکھنے والے دو نوجوان کزنز عادل ولد عبدلرحیم (مرحوم) اور معاذ ولد رشید پیدل سفر کرکے لہورکس جنت آبشار کی طرف نہانے اور قدرتی مناظر دیکھنے کیلئے جارہے تھے کہ نکر تا موہڑہ پرانی کیبل کار لفٹ کے قریب راستے میں جاتے ہوئے عادل نامی لڑکے کا پاؤں پھسلا اور وہ سینکروں فٹ گہری کھائی میں جاگرا۔معاذ اسے بچانے اور پکڑنے کیلئے اسکے پیچھے بھاگا اور خود بھی گر کر شدید زخمی ہو گیا .عادل بلندی سے گرنے، سر اور چہرے کی گہری چوٹوں کے باعث موقع پر جان بحق ہو گیا۔

موہڑہ لمی جوہی کے مقامی لوگوں نے اپنی مدد آپ کے تحت لاش کو گہری کھائی سے چارپائی سے باندھ کر لمی جوہی کے مقام پر پہنچایا ۔ورثا اور ریسکیو ٹیم نے ڈیڈ باڈی کوبراستہ کیبل کار ترمٹھیاں منتقل کر دیا۔

دوسرا حادثہ مری ایکسپریس وے لکوٹ کے قریب پیش آیا جس میں کار نے موٹر سائیکل سواروں کو ٹکر مار دی ایک موٹر سائیکل سوار موقع پر جاں بحق ہو گیا جس کا تعلق مظفرآباد سے ہے۔۔