اونٹ کی ٹانگ کاٹنے والا ظالم وڈیرہ گرفتار ؟

تفصیلات کے مطابق سندھ کے شہر سانگھڑ میں ایک وڈیرے نے کھیت میں داخل ہونے پر اونٹ کی ٹانگ کاٹ دی، ویڈیو وائرل ہونے پر پولیس نےتین افراد کو حراست میں لے لیا۔ ضلع سانگھڑ میں کھیت میں داخل ہونے پر وڈیرے کی جانب سے اونٹ کی ٹانگ کاٹنے کا انسانیت سوز واقعہ پیش آیا ہے۔ جس کی ویڈیو بھی وائرل ہوگئی۔ واقعے نے سب کو ہلا کر رکھ دیا اور اس پر سخت ردعمل سامنے آیا ہے.پولیس کے مطابق واقعہ جمعہ کو ضلع گاؤں منڈ جمڑاؤ میں پیش آیا، اونٹ کے مالک سومر خان نے کہا میری کسی سے کوئی دشمنی نہیں ہے، مجھے نہیں معلوم کہ میرے اونٹ کے ساتھ ایسا کیوں کیا گیا۔

اونٹ کی ویڈیو وائرل ہونے کے بعد پیپلزپارٹی کی رہنما اور رکن قومی اسمبلی شازیہ مری نے ڈپٹی کمشنر سے رابطہ کیا اور واقعے کی تفصیلات مانگیں۔ ڈاکٹرز کی ٹیم نے گاؤں پہنچ کر زخمی اونٹ کی مرہم پٹی کی اور پولیس نے سرکار کی مدعیت میں نامعلوم ملزمان کیخلاف مقدمہ درج کرلیا۔ ایس ایس پی اعجاز احمد شیخ نے کہا کہ اونٹ کی ٹانگ کاٹنے کے کیس میں 3 افراد کوحراست میں لے لیا ہے اور زیرِ حراست ملزمان سے پوچھ گچھ کی جارہی ہے۔

دوسری جانب گورنر سندھ کامران خان ٹیسوری نے اس سلسلے میں متاثرہ شہری کو دو اونٹ دینے کا اعلان کیا ہے، گورنر سندھ نے کہا اونٹ کی ٹانگ کاٹ کر غریب شخص سے اس کی روزی بھی چھینی گئی، قربانی کا مہینہ دوسروں کے دکھ درد کا احساس جگانے کی کوشش ہے، میں دورہ حیدرآباد کے دوران سانگھڑ کے متاثرہ شخص کو اونٹ دوں گا۔ کامران ٹیسوری نے کہا کہ پولیس واقعے کے اصل ذمہ داروں کے خلاف کارروائی کرے، اور مظلوم شہری کو انصاف دیا جائے۔