گاؤں میں عید الاضحیٰ ….محمد نعیم کی دل کو چھوتی تحریر

ہمارے استاد اور امام و خطیب مولانا مسعود الرحمٰن صاحب (جندر والے) رحمہ اللہ نماز عید پڑھا کر قربان گاہ میں آ جاتے اور ہر جانور پر قربانی کی دعا پڑھتے ہوئے چھری پھیر کر چلے جاتے۔ امام صاحب جانور کو ذبح کر لیتے تو ان تمام افراد کو باری باری بلایا جاتا جس کا ایک جانور میں حصہ ہوتا تھا اور وہ کٹے ہوئے جانور کے گلے پر علامتی قسم کی چھری پھیر دیتے۔ کئی بار یہ کام میرے حصے میں بھی آیا۔ اس کے علاوہ قربانی کا جانور گرانے میں مدد کرنا بھی ہم بچوں کے حصے کچھ نہ کچھ آ جاتا۔ جیسے جانور گرتے ہی جب اس کی چاروں ٹانگوں کو بنگا ڈال کر باندھ دیا جاتا تھا تو اس کی دم کو بھی بندھی ہوئی ٹانگوں میں سے گزار کر کھینچ لیا جاتا۔ کبھی ہمارے حصے میں یہ کام آتا اور کبھی جانور گرنے کے بعد اس کی کوہان (دیسی بیلوں کے دنوں کندھوں کے درمیان ابھرا ہوا گوشت, شاید اسے بھی کوہان ہی کہا جاتا ہے) اور اگلی ٹانگوں پر کئی لوگ اپنا وزن ڈال دیتے تاکہ وہ چھری پھرتے وقت زیادہ ہل جل نہ کرے۔ ایک بار میرے بڑے بھائی ابراہیم اسی طرح جانور گرانے میں مدد کر رہے تھے اور گرے ہوئے بیل کی ٹانگیں رسی سے کسی جا رہی تھیں کہ بیل نے زور لگا کر رسی کو ڈھیلا کر لیا۔ اور اپنی آپس میں بندھی ہوئی پچھلی دنوں ٹانگوں کو ایک زور سے جھٹکا دیا۔ ابراہیم بھائی اس کی زد میں آئے اور اس کک کی وجہ سے کافی دور جا کر گرے۔

پھر کچھ وقت جانوروں کو نیچے نالے (کسی) میں لے جانے کے بجائے محلے میں ہی حاجی میر حسن صاحب کے گھر کے پیچھے ذبح کیے جانے لگے اور گوشت بنانے کے لیے چچا لعل اکبر اور حاجی میر حسن صاحب کی چھت پر ہی سب بیٹھ جاتے۔ اس دور میں مسجد بہت ہی چھوٹی تھی اور مسجد کے بعد کوئی بڑا گراؤنڈ قریب قریب نہیں تھا۔ اس لیے نماز عید جاوید بھائی اور یوسف بھائی کے مکانوں کی چھت پر ہی پڑھتے تھے۔ نماز عید کے بعد سب اہنی چھریاں وغیرہ ساتھ لائے ہوئے ہوتے تھے۔ وہیں سے قربان گاہ چلے جاتے ۔ عموماً ظہر کی نماز سے پہلے پہلے سب قربانی کرنے والوں کے گھروں میں ان کا گوشت پہنچ جاتا۔ اجتماعی قربانی والی جگہ حصے لگاتے وقت سات حصوں میں سے برابر برابر تھوڑا گوشت الگ کر لیا جاتا۔ اس گوشت کو ( مسکینی بنڈا) کہا جاتا تھا۔ یہ گوشت محلے کے غریب گھروں اور وہاں آئے چھوٹے چھوٹے بچوں میں تقسیم کیا جاتا۔

یہی وجہ ہے کہ میرے سمیت اکثر بچے عید پڑھنے جاتے وقت جیب میں ایک شاپر بھی رکھ لیتے۔ قربانی کا گوشت گھر پہنچنے کے بعد محلہ کے ان گھروں میں دوبارہ تھوڑا تھوڑا حصہ بھیجا جاتا جو قربانی نہیں کر سکے تھے۔ وہ انتہائی غربت کا دور تھا۔ ایسے نہیں تھا کہ شہروں کی طرح ایک ایک گھر میں کئی کئی قربانیاں ہوئی ہوں۔ بلکہ خاندان کا سربراہ تمام اہل خانہ کی جانب سے ایک ہی قربانی کر پاتا۔ باقی ماندہ گوشت میں سے گھر میں کوئی سالن بنا لیا جاتا تھا۔ میں تازہ گوشت میں سے بغیر ہڈی کے سرخ سرخ بوٹیاں نکالتا اور سلور کے موٹے تار کو سیدھا کر کے اس کی سیخ بناتا ، اس میں بوٹیاں پروتا اور انھیں چولہے میں جلتی آگ کے جب دہکتے کوئلے رہ جاتے تو ان پر رکھ کر بھون لیتا۔ کبھی صرف نمک اور کبھی نمک کے ساتھ ہلکی سے لال مرچ لگا کر کھا جاتا بہت اچھا لگتا وہ گوشت ۔ یہی ہوتا تھا اس دور کا باربی کیو بھی اور اسٹیک بھی۔ کبھی کبھی گوشت اوپر سے تو بھن جاتا مگر اندر سے کچا رہ جاتا۔ ایسی بوٹی کو چیونگم کی طرح اچھے خاصے وقت تک منہ میں چباتے رہتا۔

اس دور میں گاؤں میں فریج، فریزر نہیں آئے تھے۔ قربانی کے بچے ہوئے گوشت کو سکھا کر تاروں میں پرو کر ہار سے بنا لیے جاتے۔ اور اسے کسی چھت کی کڑی کے ساتھ لٹکا دیا جاتا۔ یوں یہ لمبے عرصے تک قابل استعمال رہتا۔ شکاری کبابوں کی طرح کا یہ گوشت بھی ایک الگ ذائقہ رکھتا تھا۔ اپنے ندیدے پن کی وجہ سے میں وقتاً فوقتاً تار میں سے کھینچ تان کر کوئی بوٹی نکال لیتا اور اس خشک گوشت کو کھا لیتا۔ کئی دفعہ چار پائی یا اور کسی اونچی چیز پر سے یہ گوشت اتارتے وقت گرا بھی تھا۔ مگر وہ وقت ایسا ہوتا ہے جب نہ چوٹ کی تکلیف یاد رہتی ہے۔ نہ گرنے کے بعد زیادہ دیر رونے کی ضرورت ہوتی ہے۔ میرے خیال میں اب شاید ہی ہمارے علاقے میں کوئی گوشت کو یوں محفوظ کرتا ہو۔ پرانے بزرگ دنیا سے گئے ہیں تو سنا ہے اب لوگ جانور بھی ایک مشترکہ جگہ لے کر نہیں جاتے بلکہ اپنے گھروں کے سامنے ہی ذبح کر لیتے ہیں۔ میں نے آخری بار بڑی عید گاؤں جا کر کب کی، کچھ یاد نہیں۔ اب کیا صورتحال ہوتی ہے وہاں کے مقامی دوست بہتر طور پر بتا سکتے ہیں۔ پرانے اور سمجھ دار لوگوں کے چلے جانے سے اب دیہی علاقوں میں بھی اجتماعیت بہت متاثر ہوئی ہے۔ وگرنہ گاؤں میں رہنے والوں کو دکھ سکھ سانجھے ہوتے ہیں۔ اللہ تعالیٰ سے دعا کہ سب ایک دوسرے کے لیے دل میں وسعت اور محبت رکھیں۔ اور سب آپس میں اب بھی اتحاد و اتفاق کے ساتھ شیر و شکر ہو کر رہیں۔

10 جون 2024