گوادر میں ماہی گیروں نے 17 پاکستانی موت کے منہ سے نکال لیے

غیر قانونی طور پر مسقط جا رہے تھے راستے میں کشتی خراب ہو گئی۔

گوادر میں ماہی گیروں نے غیر قانونی طور پر مسقط جانے والے 17 پاکستانیوں کو ریسکیو کر لیا۔
مذکورہ افراد کشتی کے ذریعے غیر قانونی طور پر مسقط جا رہے تھے کہ راستے میں بھٹک گئے اور اس دوران کشتی کا انجن خراب ہو گیا۔مذکورہ افراد بے بسی کے عالم میں بھوکے پیاسے سمندر کی بے رحم موجوں کہ رحم و کرم پر تھے کہ اس دوران گوادر میں ایران نے حدود کے قریب ماہی گیروں نے انہیں دیکھ لیا اور رسوں کی مدد سے ریسکیو کیا۔

اس حوالے سے سوشل میڈیا پر وائرل ویڈیو میں دیکھا جا سکتا ہے کہ پیاس اور بھوک سے نڈھال نامعلوم منزل کے یہ مسافر پانی کے لیے منت سماجت کر رہے ہیں۔
بلوچستان سے تعلق رکھنے والے ماہی گیروں نے جذبہ حب الوطنی اور انسانی ہمدردی کا مظاہرہ کرتے ہوئے اپنے پاکستانی بھائیوں کی بھرپور مدد کی اور انہیں پانی کے علاوہ خوراک بھی فراہم کی۔
ذرائع کا کہنا ہے کہ مذکورہ افراد کو بعد ازاں پاکستانی حکام نے اپنی تحویل میں لے لیا ہے۔