پاکستان میں سرمایہ کاری کا تناسب 50 برس میں کم ترین سطح پر آ گیا

اسپیشل انویسٹمنٹ فیسیلیٹیشن کونسل (ایس آئی ایف سی) کی کوششوں کے باوجود پاکستان میں سرمایہ کاری کا تناسب 50 برس میں اپنی کم ترین سطح پر آ گیا ہے، جو کہ ختم ہونے والے مالی سال میں معیشت کے حجم کے صرف 13.1 فیصد تک گر گیا ہے۔ ایکسپریس ٹریبیون کی رپورٹ کے مطابق یہ نصف صدی کا کم سرمایہ کاری سے مجموعی ملکی پیداوار (جی ڈی پی) کا تناسب ان خدشات کی تصدیق کرتا ہے کہ تنہا SIFC پاکستان کی معیشت کے بنیادی پہلوؤں اور سیاسی استحکام کے حصول میں بہتری کے بغیر سرمایہ کاری کو نمایاں طور پر فروغ نہیں دے سکتا۔

سرکاری اعداد و شمار میں پاکستان بیورو آف سٹیٹسٹکس (پی بی ایس) کی جانب سے ایک روز قبل منظور کیے گئے قومی کھاتوں میں استعمال کیے جانے والے آبادی کے اعداد و شمار میں بھی تضاد کا انکشاف ہوا ہے۔ اس تفاوت کے نتیجے میں ختم ہونے والے مالی سال کے لیے  فی کس آمدنی میں اضافہ ہوا ہے۔ 2023 کی مردم شماری کے نتائج کے مطابق ملک کی آبادی 241.5 ملین تھی۔ تاہم، پی بی ایس نے 236 ملین کی پرانی آبادی کا استعمال کیا۔

قومی اکاؤنٹس کے عارضی تخمینوں کے مطابق، پاکستان کی معیشت میں سرمایہ کاری اور بچت کی شرح ختم ہونے مالی سال کے سرکاری اہداف سے کم رہیں۔ اس طرح کی کم بچت اور سرمایہ کاری کا تناسب بیرونی شعبے کے بحرانوں کی جڑ ہے۔

پچھلے ایک سال میں  ایس آئی ایف سی نے سرمایہ کاری کیلئےغیر معمولی کوششیں کیں

واضح رہے کہ پی دی ایم حکومت نے پارلیمنٹ کے ایک ایکٹ کے ذریعے SIFC قائم کیا تھا، جس کا مقصد ملک میں سرمایہ کاری کو فروغ دینا اور اقتصادی ترقی کی راہ میں حائل رکاوٹوں کو دور کرنا تھا۔ SIFC ایک مشترکہ ادارہ ہے جسے فوج اور سویلین دونوں چلاتے ہیں۔ اس نے پچھلے ایک سال میں سرمایہ کاری کیلئےغیر معمولی کوششیں کی ہیں۔ تاہم، یہ کوششیں ابھی تک ٹھوس نتائج میں تبدیل نہیں ہوئی ہیں .ذرائع بتاتے ہیں کہ جاری بات چیت کے دوران انٹرنیشنل مانیٹری فنڈ (آئی ایم ایف) نے پاکستان سے رواں مالی سال اور اگلے مالی سال میں متوقع سرمایہ کاری کے بارے میں دریافت کیا ہے۔

SIFC نے اب تک وفاقی اور صوبائی حکومتوں کے درمیان رابطہ کاری کے مسائل کو حل کرنے اور طریقہ کار کی رکاوٹوں کو دور کرنے میں کامیابی حاصل کی ہے۔ تاہم، ان کوششوں سے غیر ملکی یا ملکی سرمایہ کاری میں خاطر خواہ اضافہ نہیں ہوا۔

13.1% سرمایہ کاری سے جی ڈی پی کا تناسب علاقائی ہم عصروں سے نمایاں طور پر کم ہے۔ پچھلے سال یہ تناسب 14.1 فیصد رہا۔

واضح رہے کہ پاکستان سعودی عرب سے 5 ارب ڈالر تک کی سرمایہ کاری کی توقع کر رہا تھا لیکن اب تک ان یقین دہانیوں کو ٹھوس معاہدوں میں تبدیل نہیں کیا گیا۔حالیہ دنوں میں شہزاد محمد بن سلمان کے دورہ پاکستان سے کافی امیدیں وابستہ تھیں تاہم یہ دورہ بھی عین مواقع پر منسوخ ہو گیا.

مقررہ سرمایہ کاری سے جی ڈی پی کا تناسب بھی پچھلے سال کی 12.4 فیصد کی سطح سے گھٹ کر 11.4 فیصد پر آ گیا۔ اس مالی سال میں نجی شعبے کی سرمایہ کاری جی ڈی پی کے 8.7 فیصد تک گر گئی ہے، جو کہ تقریباً 25 سال کی کم ترین سطح بھی ہے۔

رپورٹ کے مطابق پبلک سیکٹر کی سرمایہ کاری سے جی ڈی پی کا تناسب 2.8 فیصد تک گر گیا – جو چار سالوں میں سب سے کم سطح ہے۔ وزارت خزانہ کی جانب سے 950 ارب روپے کا کل مختص بجٹ جاری نہ کرنے کے باعث عوامی سرمایہ کاری مالیاتی رکاوٹوں سے متاثر ہوئی ہے۔

ٹیکس لگانے کی پالیسیوں میں متواتر تبدیلیوں اور مینوفیکچرنگ سیکٹر کے حوالے سے غلط حکمت عملی نے پبلک

مینوفیکچرنگ میں سرمایہ کاری کو کم کر دیا ہے۔ ملک کی پیداواری صلاحیت کم ہو رہی ہے، اور اقتصادی ترقی بڑی حد تک کھپت سے چلتی ہے، جو کہ معیشت کے حجم میں اضافے کا تقریباً 88 فیصد ہے۔رپورٹ کے مطابق سرمایہ کاری کے اہم ہدف کو حاصل کرنے میں ناکامی نے اپنے وسائل کا استعمال کرتے ہوئے بگڑتے ہوئے انفراسٹرکچر اور سماجی شعبے کے مسائل کو حل کرنے کی حکومت کی صلاحیت کو محدود کر دیا ہے، جس کی وجہ سے ترقیاتی منصوبوں کے لیے قرضوں پر انحصار میں اضافہ ہوا ہے۔