نویاں نسلاں نی تربیت تے والدین نیاں کوتاہیاں 

ان شاءاللہ "اقبال نیں شاہین” اس ہفتے نیں دوران جلد بندی سی بعد لبھی گیسی۔ اس کتاب وچ نویں نسل نی تعلیم تے تربیت نیں حوالے نال مضمون شامل اے۔ ایہہ مضمون استاداں تے والدین کی ضرور پڑھنے چائینے۔

ہک ہور کتاب وی بہوں ضروری ای، کدے کوئی سنگی لخی سکے تے بہوں بڑی خذمت ہوسی۔ اساں کی اولاد نیں حوالے نال والدین نیں رویاں ناں تنقیدی جائزہ کہنناں چائیناں۔ بے جا لاڈ پیار تے آسائشاں نی فراہمی نال بچیاں نیں کردار تے شخصیت اپر کیہہ اثر ہوناں آ۔

جاپان وچ سکول نیں بچیاں نی کردار سازی اسرے ہونی جے اوہ عملی طور اپر ہک ذمہ دار انسان، دنیا کی اپنا کہر (گھر) سمجھنے والے باشعور فرد، اپنے کم خود کرنے نیں عادی، ٹیم ورک نی اہمیت سمجھنے والے، ساری مخلوق نی پہلیائی چاہنے والے، وقت نی قدر کرنے والے تے تخلیقی صلاحیتاں ناں پہرپور فائدہ چانیں والے منفرد انسان بنن۔

جاپان وچ سکول نی صفائی ستھرائی واستے کوئی صفائی ناں عملہ ناء ہونا بلکن بچے تے استاد آپوں یوء کم کرنے اے۔ اس وچ چھل چھوویاں (باتھ روم) وی شامل اے۔ نالے برآمدے وی تے کھیڑ ناں میدان وی۔ استاد اسرے وی عملی تربیت کرنے جے کلاس شروع ہونے سی پہلیاں کرسیاں کی بے ترتیبی نال کھلاری شوڑنے۔ پورے کلاس روم کی کاغذ تے گتے نیاں ٹوٹیاں نال پہری شوڑنے۔ بچے جسلے کلاس روم وچ اشنے تے پہلیاں اوہ کرسیاں کی ترتیب نال رکھنے۔ سارے کاغذ چنی تے کچرے نیں ڈبے وچ باہنے تے فر ہتھ تہوئی تے اپنی اپنی کرسی اپر بیہی رہنے۔ خاص گل یاء ای جے اس کم وچ ہر بچے نی سدھر (خواہش) ہونی جے اوہ سب سی زیادے حصہ کہنے۔

والدین کہر وچ وی بچیاں کی عملی زندگی واستے اسرے تیار کرنے جے اوہ اپنے اکثر کم خود کرنے نی عادت باہن۔ بچیاں نیں کمرے وچ الارم لگا وہاء ہونا۔ الارم بجنے نال یے بچہ آپوں اٹھی رہنا۔ اوہ آپوں تیار ہونا۔ آپوں وردی تے بوٹ لاناں۔ کھانے نیں کمرے وچ اچھی تے اپنا ناشتہ شیلف اپرا چائی تے ٹیبل اپر آنناں۔ سلیقے نال ڈائننگ ٹیبل اپر بیہی تے ناشتہ کرنا۔ خالی برتن ٹیبل اپر کھلاری تے سکول نسنے نیں بجائے اپنی ٹرے موڑی تے شیلف اپر کھڑنا۔ ٹرے کی اس نی جائی وچ رکھنا۔ اپنا گلاس، پلیٹ تے پیالی (ڈش واشر نیں ذریعے) صاف کری، سکھائی (خشک کر کے) تے انھاں نی جائی وچ رکھنا۔ ہتھ فر تہوئی، دند ہک واری فر صاف کری تے سکول بس وچ بیہی تے سکول چلا گشناں۔

ہن اس ناں موازنہ اپنے بچیاں نال کرو۔ اساں اپنے بچیاں کی نکما، نکھٹو، کم چور تے تن آسان بنانے وچ اپنا کوئی ثانی نیئاں رکھنے۔ ماوریں (والدہ) تے بچیاں کی غیر ضروری لاڈ پیار، غلط فرمائشاں منی، بچیاں نیاں غلط کماں اپر پردے باہی، بچیاں نیں سارے کم آپوں کری، انھاں نیں تسمے وی آپوں بنہی تے انھاں کی اتنا ناکارہ بنانیاں جے اوہ کچے نی بنگ بنی تے دوویاں نی متھاجی نیں عادی ہوئی گشنے۔ نوبت اتھیں تک پوہچنی جے ایہہ بچے پانی وی اٹھی تے آپوں نیہے پینے تے اپنا گلاس گچھی کچن وچ رکھنا تے آپوں استعمال کیتے ہوئے پہانڈیاں کی تہوناں بہوں دور نی گل ای۔

صبح سکول نی وین اشنے سی ہک کہنٹہ (گھنٹہ) پہلیاں ماء بچے کی جغانے نی کوشش کرنی جس وچ اس کی ادھے کہنٹے بعد کامیابی لبھنی۔ فر بچے کی منہ ہتھ تہوانا، دند صاف کرانا، یونیفارم لاواناں، بستہ تیار کرنا، پچھیئیں (ناشتہ) کروانا ۔۔۔۔ ہبیں کیں (سب کچھ) ماؤ نیں ذمے ہونا۔ وین جد توڑی دس منٹ ہارن نانہہ بجائے نواب صاحب کہرا (گھر سے) باہر نکلنے ناں نآں نیہے کہننے۔

سکول وچ بچہ استاداں کی اپنا نوکر سمجھناں۔ اوہ کلاس کی صاف رکھنے نیں بجائے اس کی جتنا گندا کری سکے کرنا آ۔ کرسیاں تے ڈسک جتنے خراب ہوئی سکن اوہ کرنے نی کوشش کرنا۔ کنداں (دیواروں) اپر بیل بوٹے بنانا ثواب ناں کم سمجھنا۔ چھٹی ویلے کلاس روم، برانڈے تے میدان گند بلا نال اسرے پہرے ہوئے ہونے جسرے اتھیں گند پھیلائے ناں مقابلہ وہاء ویہہ۔

مہاڑی سدھر ای جے کوئی دوست اس پاسے توجہ دے۔ نویاں نسلاں کی انسان دوست، صفائی پسند، ہمدرد، ماحول دوست، محنتی تے مہذب بنانے واستے والدین نی رہنمائی ناں فریضہ سر انجام دے۔

راشد عباسی