ججز کےخط پر ریٹائرڈ جج کی سربراہی میں کمیشن بنانے کا اعلان

اسی دوران ایک اور بڑی پیشرفت یہ سامنے آئی کہ سپریم کورٹ کا فل کورٹ اجلاس ایک بار پھر چار بجے طلب کر لیا گیا۔
اٹارنی جنرل کے ہمراہ اسلام اباد میں پریس کانفرنس سے خطاب کرتے ہوئے وزیر قانون کا کہنا تھا کہ ججز کے خط کے معاملے پر وزیراعظم نے مصروفیات کے باوجود چیف جسٹس سے ملاقات کا فیصلہ کیا۔ یہ ملاقات ڈیڑھ گھنٹے جاری رہی۔ اس موقع پر وزیراعظم نے کہا کہ عدلیہ کی آزادی پر کوئی سمجھوتا نہیں ہوگا ۔حکومت کا فرض ہے کہ اس معاملے کی چھان بین ہونی چاہیے لہذا یہ معاملہ وزیراعظم کل کابینہ کے سامنے رکھیں گے۔ کمیشن کا قیام کابینہ کا اختیار ہے۔

وزیر قانون نے کہا کہ غیر جانبدار ریٹائرڈ ججز کی سربراہی میں انکوائری کرائی جائے گی۔ ملک میں نظام موجود ہے۔ قانون کے تحت کارروائی ہوگی۔ سب سے پہلے خط کے حوالے سے چھان بین کی ضرورت ہے۔ دو سے چار روز میں کمیشن بنا کر اس کا نوٹیفکیشن جاری کر دیا جائے گا۔
وزیر قانون کے مطابق وزیراعظم کا کہنا تھا کہ ایک رکنی کمیشن بنایا جائے۔ ادارہ جاتی مداخلت نہیں ہونی چاہیے۔ اگر خط کے مندرجات درست ہیں تو ان کا ذکر بھی ٹی او آرز میں کیا جائے گا۔

اس سوال پر کہ کیا ججز کی جانب سے خط لکھنے کا اقدام مس کنڈکٹ قرار دیا جا سکتا ہے؟ وزیر قانون کا کہنا تھا کہ ان کی ذاتی رائے ہو سکتی ہے، تاہم یہ معاملہ عدلیہ پر چھوڑ دینا چاہیے۔ بطور وکیل مجھے خط کی ٹائمنگ پر تکلیف ہے۔جب واقعات رونما ہوئے اسی وقت ایکشن لیا جاتا تو زیادہ مناسب ہوتا۔

 Commission headed by a retired judge on the letter of the judges, ججز کے خط پر انکوائری کمیشن بنانے کا اعلان