ججز کے خط پر جوڈیشل کمیشن بنایا جائے۔۔تحریک انصاف کا مطالبہ

پاکستان تحریک انصاف کے چیئرمین بیرسٹر گوہر نے عدلیہ میں مداخلت کے الزام کی تحقیقات کے لیے جیوڈیشل کمیشن بنانے کا مطالبہ کرتے ہوئے کہا ہے کہ ہم دو سال سے اس معاملے پر بات کر رہے ہیں۔ اب جج صاحبان کو بھی اللہ نے ہمت دی ہے تو اس معاملے کی تحقیقات ہونی چاہیے۔
اسلام آباد میں سینئر پی ٹی آئی رہنما عمر ایوب کے ہمراہ پریس کانفرنس کرتے ہوئے بیرسٹر گوہر کا کہنا تھا کہ اسلام آباد ہائی کورٹ اور عدلیہ میں مداخلت ہوتی رہی جو آج بھی ہو رہی ہے۔ ہر ایک جج کو دباؤ میں لایا گیا۔ ان کا کہنا تھا کہ ججز نے خاص طور پر سیاسی مقاصد کا ذکر کیا ہے کہ کس طرح دباؤ ڈال کر تین مقدمات کے فیصلے کرائے گئے۔ ہائی کورٹ کے چھ جج دباؤ سے متاثر ہوئے ۔ججز کے خط کی انکوائری کے لیے جوڈیشل کمیشن کا قیام ضروری ہے۔
بیرسٹر گوہر کا کہنا تھا کہ اگر اس خط پر کارروائی نہیں ہوئی تو عدلیہ سے لوگوں کا اعتماد اٹھ جائے گا۔ انہوں نے مطالبہ کیا کہ خط لکھنے والے ججز اور ان کی فیملیز کا تحفظ بھی یقینی بنایا جائے۔