عمل خیر… پہلےضروریات اور فضولیات میں فرق جانئے

لیکن روایات کسی نہ کسی صورت کہیں کہیں اگلی نسل تک پہنچتی ہیں یہ ایک ہنر نواسی کو منتقل ہوا۔
اگر عام دنوں میں وہ دس دن میں کھانا بناتی تو رمضان میں اس شوق کو ہفتے میں دو تین بار پورا کرتی۔پہلے روزے کو اس نے سارا دن اسی تیاری میں گزارا۔مقررہ وقت سے پہلے ہی چھوٹا دسترخوان لیے وہ محلے کے دروازوں پہ تھی۔ہر گھر کے رونق میلے اور چہل پہل اسے بتا رہی تھی کہ گھر کے حالات کیسے ہیں۔اہلخانہ زندگی جی رہے ہیں کہ گزار رہے ہیں۔کہیں سے مطمئن تو کہیں سے رنجیدہ وہ خالی برتن لیے نئے منصوبوں کے ساتھ واپس اپنے گھر آتی اور پھر چلی جاتی۔اک گھر گئی تو پانچ بچوں کے ہوتے ہوئے بھی خاموشی تھی نہ کوئی اہتمام نہ کوئی رونق رمضان۔بچے ماں کے ہاتھ میں پکڑے دسترخوان کی طرف لپکے ۔ماں نے بھی اسے زمین پہ رکھ دیا۔بچے بنا سانس لیے کھاتے رہے۔یہ کچھ کہنا چاہ رہی تھی مگر حلق میں کانٹے اگ آئے تھے۔اٹھنا چاہ رہی تھی مگر پاوں منوں بھاری۔۔۔سامنے بیٹھی جوان بیوہ کی آنکھوں میں تیرتے آنسو بہت سی کہانیاں سنا رہے تھے۔اپنا دست شفقت اس کے سر پہ رکھا تو وہ ہچکیوں سے رونے لگی۔

"باجی ！ فیکٹری والوں نے تنخواہ نہیں دی۔راشن ختم ہے ،تین دن سے تو آٹا بھی نہیں ۔کرایا نہیں دے سکی۔بل بھی۔۔۔۔۔۔۔”
وہ پتہ نہیں کیا کیا کہتی رہی اسے کچھ سنائی نہ دیا۔اس کے حلق میں وہ سارے کھانے اٹک گئے جو تین دن تین وقت اس نے مزے سے کھائے تھے۔پڑوسیوں کے حقوق ،مذہبی و اخلاقی اقدار سب نظر میں گھومنے لگا۔بے خبری اور لاپرواہی کا دکھ ہلکان کرنے لگا۔۔۔وہ بدحواس سی اپنا برتن وہی چھوڑ کر باہر نکل آئی۔وہ جانتی تھی اس نے اپنے صدقات و فطرات کا کیا کرنا ہے ۔اسے ایک شام کی محنت نے اپنے اردگرد کے سبھی حالات سے باخبر کر دیا تھا ۔مگر کوئی بوجھ تھا کہ دسترخوان پہ رکھی بے تحاشا نعمتوں سے اسے اب کوئی لگاو نہیں رہا تھا۔وہ انہیں یہاں سے کم کر کے کسی اور کے دسترخوان کو مکمل کرنے کے منصوبے پر عمل کر رہی تھی۔رفتہ رفتہ اس نے اپنی ضروریات اور فضولیات میں فرق جان لیا۔یہی ایک راستہ تھا اس مشکل دور میں کسی بھی عمل خیر کو پایہ تکمیل تک پہنچانے کا۔اسے معلوم ہے اس کی یہ کاوش قطرے برابر ہے مگر قطرہ قطرہ دریا بنتا ہے وہ یہ بھی جانتی ہے۔