کچے کے ڈاکووں کا نیشنل ہائی وے پر گڈز ٹرانسپورٹرز پر حملہ

گڈز کیریئر ایسوسی ایشن کراچی کے جوائنٹ سیکریٹری رانا طارق شعیب کا کہنا ہے کہ ڈاکووں نے ٹرکس پر فائرنگ کی ، ڈاکووں کی فائرنگ سے ڈرائیور شدید زخمی ہوا جو دوران علاج دم توڑ گیا۔

رانا طارق شعیب نے بتایا کہ ڈاکو ایک ٹرک ڈرائیور کو اغواء کرکے بھی لے گئے جبکہ ڈاکووں کی فائرنگ سے ٹرکس اور سامان کو شدید نقصان پہنچا۔

ان کا کہنا تھا کہ ایسے حالات میں کیسے گاڑیاں چلائیں کیونکہ ڈرائیور بھی گھبرا رہے ہیں، ایسے واقعات میں کسی شخصیات کا ہاتھ لگتا ہے۔

انہوں نے کہا کہ ڈاکو وارداتیں کرنے سے بعض نہیں آرہے ہیں ایسے واقعات کی روک تھام حکومت کا کام ہے اگر ایسے واقعات ہوتے رہے تو کراچی پورٹ پر ویرانی چھا جائے گی۔

رانا طارق شعیب نے کہا کہ ڈاکووں سے سختی سے نمٹنا ہوگا کیونکہ ٹرانسپورٹرز سندھ میں گاڑیاں چلانے کی پوزیشن میں نہیں ہیں۔

انہوں نے مطالبہ کیا کہ ڈرائیور حضرات پر ترس کھائیں اور ٹرانسپورٹرز کو مافیا سے بچائیں ڈاکووں کی پشت پناہی کرنے والوں کے خلاف کاروائی کی جائے ساتھ ہی ڈرائیورز کو بازیاب کروایا جائے۔