مری سے تعلق رکھنے والے نوجوان لیگی رہنما وسابق امیدوار قومی اسمبلی حلقہ این اے 51 سردار محسن عباسی نے کہا ہے کہ ہم نے مسلم لیگ ن کیلئے جیلیں کاٹیں،بہت صعوبتیں برداشت کیں اور مسلم لیگ کاجھنڈا ہمیشہ بلندرکھا لیکن میاں محمدنواز شریف کے مری میں جلسہ عام کے موقع پر ہمیں سٹیج پر جانے کی اجازت نہ دی گئی۔یہ بڑی زیادتی کی بات ہے۔
انہوں نے کہا کہ میں نے بھی حلقہ این اے 51 سے ن لیگ کے ٹکٹ کیلئے درخواست دی تھی اوراعلان کیاتھا کہ ٹکٹ نہ ملنے پر جس کو بھی پارٹی ٹکٹ دے گی اس کی حمایت کرون گا لیکن ہماری قربانیوں کا یہ صلہ ملاکہ قائد میاں محمدنواز شریف کے سٹیج پر بھی جانے نہیں دیاگیا۔
واضح رہے کہ قبل ازیں محسن عباسی تواتر سے یہ دعوٰی کرتے رہے ہیں کہ انہیں این اے 51 سے نواز لیگ کا ٹکٹ مل رہا ہے اور قیادت نے یہ بات کنفرم کر دی ہے تاہم بعد ازاں ان کیخلاف چیک باؤنس ہونے کا ایک مقدمہ سامنے آ گیا جسے انہوں نے اپنے خلاف سازش سے تعبیر کیا اور پارٹی قیادت کیخلاف دھواں دھار پریس کانفرنس کی۔
