سردار مہتاب نے نوازلیگ کو پھر آڑے ہاتھوں لے لیا

سردار مہتاب احمد خان نے کہا کہ الیکشن کے دنوں میں وعدے اور ترقیاتی منصوبوں کے اعلانات کرنے والے ٹھگ اور فراڈ ہوتے ہیں، میں عملی کاموں پر توجہ دیتا ہوں۔ میرا ماضی گواہ ھے کہ سرکل بکوٹ 1985سے قبل کس قدر پسماندہ تھا اورمیرے جو منصوبے جہاں تھے اب بھی وہیں ہیں، انہیں کسی نے آگے نہیں بڑھایا۔

سردار مہتاب نے کہا کہ ہم پہاڑوں پر بسنے والے کسی کے غلام نہیں کہ کوئی مالشی پالشی ہمیں دباؤ میں لائے۔ میں نے پرویز مشرف کی آمریت میں تین سال قید کاٹی۔ غلاموں کی طرح نہ سرجھکایا نہ دباؤ میں آیا اور نہ ہماری روایت ہے کہ ہم کسی کی غلامی قبول کریں گے۔انہوں نے کہا کہ میرے خلاف باتیں کرنے والوں کو 8 فروری کے الیکشن میں پتہ لگ جاۓ گا آج ان کا ٹکٹ لینے کے لئے کوئی تیار نہیں۔

سردار مہتاب نے کہا کہ میں نے جس جماعت کو اپنی زندگی کے بہترین سال دیے اب وہ جماعت سوداگروں کی جماعت بن چکی ہے۔ میں نے نہ تو ٹکٹ مانگا اور نہ خوشامد کی، میرا ٹکٹ میری پارٹی میرے پہاڑوں پر بسنے والے یہ غیرت مند  میرے ساتھی بزرگ اور نوجوان ہیں ہم سب نے مل کر ان لٹیروں سے ملک کو بچانا ہے اور ان کی سیاسی اجارہ داری بھی ختم کرنی ہے۔

اس موقع پر سردار حسیب عباسی ایڈوکیٹ، نائب ناظم نگری بالا سردار صادق ،چیئرمین ویلج کونسل بکوٹ درویش آباد زراب عباسی، افتخار عباسی ودیگر نے  بھی خطاب کیا اس سے قبل شاندار ریلی اور پروگرام کا انعقاد چیئرمین سیف اللّہ عباسی ۔معیاد عباسی ودیگر نے کیا۔ ان کی معاونت سردار آفتاب، کرم داد عباسی اور مہتاب عباسی نے کی۔