راشد عباسی دا پہاڑی شعری پراگہ "عشق اڈاری” نویں سال دا بہترین تحفہ

راشد عباسی پہاڑی زبان دے سرکڈھ لکھاری نیں۔ "عشق اُڈاری” ایہناں دا خوبصورت شعری پراگہ اے، جیس دی اشاعت دسمبر 2023ء وچ عمل وچ آئی۔ ایس شعری پراگے نوں ادبی دوستاں تے ادبی اداریاں وچ متعارف کراون دا سلسلہ جنوری 2024ء دے پہلے ہفتے ای شروع کر دتا گیا اے۔ 128 صفحیاں دی ایس کتاب وچ ون سونے سرناویاں ہیٹھ دلی جذبیاں، سدھراں تے چاہواں دا بھرواں اظہار کیتا گیا اے۔ کتاب دے شروع وچ محمد آصف مرزا ہوراں دا دس صفحیاں تے مشتمل دیباچہ شامل کیتا گیا اے۔ ایہہ دیباچہ اردو زبان وچ لکھیا گیا اے۔ بہتر ہوندا جے راشد عباسی دی شاعری تے فکر دا تجزیہ پہاڑی زبان وچ ای کیتا جاندا۔

محمد آصف مرزا ہوراں پہاڑی زبان دی لسانی روایت دا ذکر کردے ہویاں جناب راشد عباسی نال اپنی دیرینہ جان پچھان دا حال احوال وی بڑے سوہنے انداز وچ پیش کیتا اے۔ جناب مرزا آصف ہوراں راشد عباسی دی شاعری دا روحانی تے فکری منبع پنجابی دی صوفیانہ تے عارفانہ شاعری نوں قرار دتا اے۔ اوہناں داتصوف بقول محمد آصف مرزا

"ایہہ اوہ تصوف اے جیہڑا انسان دوستی ،اخوت و محبت، رواداری تے غمگساری، صبر و تحمل، سوز و گداز تے درد مندی دے نال نال عاجزی دے ملے جلے جذبیاں دی وارتا اے”

معروف تخلیق کار تے ناول نگار جناب اختر رضا سلیمی ہوراں کتاب دا بیک ٹائٹل پیج لکھیا اے۔ اوہناں راشد عباسی دیاں پہاڑی زبان وادب واسطے کیتیاں کوششاں دی سلاہنا کیتی اے تے ایہناں دیاں لکھیاں نظماں نوں پہاڑی تہذیب تے ثقافت دی تصویر قرار دتا اے تے انھاں توں مسقبل وچ اک پہاڑی ناول لکھن دی وی منگ کیتی اے۔

راشد عباسی ہوراں ایس کتاب دی تخلیق تے پیش کش وچ اپنیاں تمام تر صلاحیتاں وقف کر دتیاں نیں۔ ایہناں اپنے آسے پاسے پہاڑی لکھن والے تخلیق کاراں دا اک گروپ بنا دتا اے، جیہڑے بڑی لگن تے ذوق شوق نال پہاڑی زبان نوں نویں دور تے تقاضیاں دے مطابق سوچ سمجھ کے ادبی لکھتاں دے پراگے شائع کر رہے نیں۔ راشد عباسی ہوراں دا اک وڈا کارنامہ پہاڑی زبان دے پہلے پاکستانی رسالے "رنتن” دا اجراء اے، جیس دے ہن تیک چار شمارے شائع ہو چکے نیں۔

جتھوں تیک ایس نویں کتاب "عشق اُڈاری” دا تعلق اے ایس کتاب وچ نکیاں نظماں دا اک جہان آباد اے۔ ایہہ نظماں "دیس پیار” دے جذبے وی پیش کردیاں نیں تے سماجی دکھاں سکھاں تے وسیب دے منظر نامے وی پیش کردیاں وکھائی دیندیاں نیں ۔ فکری تے فنی طور تے ایہہ پکا پیڈھا کلام من وچ اپنا ڈھیر تاثر چھڈدا اے۔ ایہناں نظماں دے کجھ سرناویں ویکھو۔ ربا شکر کراں لکھ واری، ہاۓ مَہڑیا کشمیر، حرفاں نی لوء، مِٹی نیں باوے، ڈاہڈے دکھڑے مائے، بول فقیرا بول، عرضی، عشق، سدھراں، حیاتی تے جنجال، گلاں راز نیاز ِنیئاں، سوچاں ناں جنجال، درد کہانی، کچ نی گُڈی، بین، وچھوڑا ذات ناں ڈاہڈا، اساں ویلے نیں منصور وغیرہ وغیرہ۔

کتاب دے آخیرلے صفحیاں تے بولیاں، ماہیے, تے گیت وی شامل کیتے گئے نیں۔ مکدی گل کیہ پئی راشد عباسی دی ایہہ کتاب پہاڑی زبان وچ اپنی اچیری تھاں بناون وچ کامیاب تھیسی۔ ایس دا سرورق، کاغذ، جلد بندی تے پیش کش اکھاں دی ٹھنڈک دا موجب بن دی اے۔ چنگی تخلیق دی اشاعت نال ای زبان دیاں بنیاداں پکیاں ہوندیاں نیں ۔ مینوں قوی یقین اے جے پہاڑی زبان دے لکھاریاں تے ادب دوستاں واسطے ایہہ کتاب چانن دا کم دیوے گی۔ ان شاء اللہ۔

ڈاکٹر محمد ریاض شاہد