سائفر کیس کا اوپن ٹرائل تو بند کمرہ کردیا گیا،لطیف کھوسہ

اڈیالہ جیل کے باہر میڈیا سے گفتگو میں سردار لطیف کھوسہ نے کہا کہ سائفر کیس میں اوپن ٹرائل ایک طرف رہا، انہوں نے تو اسے بند کمرہ کردیا۔

انہوں نے کہا کہ احتساب عدالت کے جج نے بھی ضمانت کی درخواستوں کی سماعت کی۔

بانی پی ٹی آئی کے وکیل نے مزید کہا کہ بشریٰ بی بی ہی کی 2 ضمانت قبل از گرفتاری درخواستوں پر بھی سماعت ہوئی۔

ان کا کہنا تھا کہ عدالت کو بتایا بانی پی ٹی آئی 3 سیٹوں سے امیدوار ہیں، درخواست ضمانت پہلے سنی جائے۔

سردار لطیف کھوسہ نے یہ بھی کہا کہ توشہ خانہ کا ریکارڈ بھی منگوانے کا کہا ہے، نیب پراسیکیوٹر نے کل کےلیے دلائل دینے کی مہلت مانگی ہے۔

پی ٹی آئی رہنما نے کہا کہ درخواست دی ہے کہ 1947 سے جتنے تحائف کسی نے لیے ان کی فہرست آنی چاہیے۔