الیکشن کمیشن کے فیصلے کیخلاف پی ٹی آئی کا کل عدالت جانے کا فیصلہ

پاکستان تحریک انصاف (پی ٹی آئی) نے الیکشن کمیشن کے فیصلے کے خلاف پشاور ہائی کورٹ سے رجوع کرنے کا فیصلہ کر لیا۔

پی ٹی آئی کے مرکزی ترجمان کا کہنا ہے کہ الیکشن کمیشن کی جانب سے انتخابی نشان واپس لینے کے خلاف کل پشاور ہائی کورٹ جائیں گے۔

نجی ٹی وی سے گفتگو میں ترجمان پی ٹی آئی نے کہا کہ کیس سے متعلق پٹیشن تیار کر لی ہے، کوشش ہو گی کہ پٹیشن کل ہی سماعت کے لیے مقرر ہو۔

انہوں نے کہا کہ پٹیشن میں الیکشن کمیشن کا فیصلہ کالعدم کرنے کی استدعا کی گئی ہے، مؤقف اپنایا گیا ہے کہ الیکشن کمیشن نے غیرقانونی فیصلہ کیا ہے۔

ترجمان کا کہنا ہے کہ غیر متعلقہ شخص کی درخواست پر انتخابی نشان واپس لینا غیر قانونی ہے۔